Тываның Чазааның неделя санында эрттирип турар Аппарат хуралынга чаа кадрны томуйлаанының дугайында чарлаан. Тываның Баштыңы Владислав Ховалыгның шиитпири-биле Чазак Даргазының көдээ ажыл-агый талазы-биле оралакчызының хүлээлгезин күүседири-биле Уран-оол Ондарны томуйлаан.
Уран-оол Ондар Тываның күрүне албанынга ажылдаан дуржулгазы улуг. Ооң мурнунда ол Чазак Даргазының оралакчызы — регионнуң көдээ ажыл-агый сайыды кылдыр, ол ышкаш Федералдыг үндүрүг албанының Тыва Республика талазы-биле эргелелинге удуртукчу албан-дужаалдарга ажылдап турган. Бо томуйлаашкынның мурнунда ол Республиканың Баштыңының чөвүлекчизи турган.
Уран-оол Ондар 1964 чылда Тыва АССР-ниң Чөөн-Хемчик кожууннуң Сүт-Хөл суурга төрүттүнген. Москваның К.А. Тимирязев аттыг көдээ ажыл-агый академиязының «Экономика болгаш көдээ ажыл-агыйны организастаары» деп тускай мергежилди, оон Тываның күрүне университединге «Юриспруденция» тускай эртемни дооскан. Ынчан-на Сибирьниң күрүне болгаш муниципалдыг башкарылга институдунга профессионал билиин бедидип, «Күрүнениң болгаш муниципалдыг садып алыышкынны чорудары» деп программаны өөренгеш, садып алыышкын адырының специализи деп квалификацияны алган.
ТР-ниң Чазааның медээзинден.
“Шын” №81 2024 чылдың октябрь 23