«Шын» солунувустуң хүндүлүг хоочуннары, эргим номчукчулары, идепкейлиг бижикчилери, шынчы чагыдыкчылары! Силер бүгүдеге аалдап келген чаа 2025 чыл-биле база январь 13-те болган Россияның парлалга хүнүн таварыштыр изиг байырывысты чедирип тур бис!
Эрткен 2024 чылдың дургузунда республикавыстың парлалга адырының кол судалы болган “Шын” солунувустуң коллективи Силерниң-биле сырый, кады ажылдап, республиканың ниитилел-политиктиг болгаш социал-экономиктиг амыдыралын, хүн бүрүде чугула болуушкуннарын чедиишкинниг чырыдып келдивис. Оон аңгыда, көдээ ажыл-агый, өөредилге, эртем, культура, кадык камгалал, хоойлу-дүрүм болгаш оон-даа өске аңгы-аңгы адырның төлээлерининиң ажыл-ижин бижип, күш-ажылдың хоочуннарывыс-биле, эрес-дидим дайынчы маадырларывыс-биле, кожуун, сумуларывыста ажылдап-чурттап чоруур ажыл-ишчилеривис-биле ажыктыг, солун интервьюларны бижип, чыл дургузунда 100 номерни белеткеп үндүрдүвүс. Идепкейжи бижикчилеривис– Силерниң киржилгеңер-биле “Шын” солуннуң почтазынга ыдып чоруткан янзы-бүрү темалыг чүс-чүс чагааларыңарны сайгарып, номчукчуларывыска чырыдар улуг үүлеге киириштирип чоруур өмек-дузаңарны ханы хүндүткел-биле демдеглеп, өөрүп четтиргенивисти илередип тур бис!
XXI чүс чылдың хөгжүлдезиниң шапкыны-биле деңге “Шын” солунувус хөгжүп, интернет четкизинде тускай арнын ажыдып, хүн бүрүде ниитилел-политиктиг чугула болуушкуннарны, медээлерни 22 муң бижидикчилеривиске болгаш өске-даа номчукчуларывыска шалыпкыны-биле дамчыдып берип турар бис.
Эргим номчукчу! Үнүп келген чаа 2025 чыл Силерге болгаш “Шын” солуннуң коллективинге төөгүлүг болгаш онзагай чылды сөңнеп турары ол. Үнүп келген чаа чылывыста республикавыстың эң-не хүндүткелдиг хоочун солуну, тыва парлалганың кол көрүнчүү болган “Шын” солуннуң тургустунганындан бээр 100 чыл болган оюн, Улуг Тиилелгениң 80 чылын база өске-даа мугур санныг хөй-хөй төөгүлүг байырлалдарны кады шупту деңге бедик тура-соруктуг, чогаадыкчы чедиишкиннерлиг демдеглеп эрттирер бис.
РФ-тиң Президентизи В. Путинниң эгелекчи саналы-биле 2025 чылды бүгү чуртка Ада-чурт камгалакчызының чылы кылдыр чарлаанын билир бис. Эрткен төөгүвүске мөгейигни илереткен, ханы ужур-утка сиңген чылывыста Күчүлүг Россияның бот-догуннаан хостуг чоруу дээш амы-тынын харам чокка өргээн бүгү салгалдың Маадырларывыска, ТШО-нуң киржикчилери эрес-дидим дайынчыларывыска хүндүткеливисти көргүзүп, солунувустуң дараазында дугаарларынга үргүлчү чырыдар бис.
Үнүп келген Чаа 2025 чыл-биле база Россияның парлалга хүнү-биле катап изиг байырывысты чедирип, ал-бодуңарга каң кадыкты, чедиишкиннерни, быжыг тура-сорукту, сырый кады ажылдажылганы, демир-үжүүңер ылгын чүгүрүк болурун күзеп, өг-бүлеңерге, чоок улузуңарга аас-кежикти, олча-омакты, амыр-тайбыңны, чаагай чолду «Шын» солунувустуң коллективиниң өмүнээзинден йөрээп тур бис!
Хүндүткел-биле, «Шын» солуннуң кол редактору С. МОНГУШ.
«Шын» №1 2025 чылдың январь 16