Октябрь 26-да Барыын-Хемчиктиң Аксы-Барлык суурунуң чурттакчыларынга өөрүнчүг хүн болган. Үрде манааны капиталдыг септелге соонда көдээ Культура бажыңының байырлыг ажыдыышкыны болган.
Туттунгандан бээр бежен беш чыл дургузунда хөй-ниитиниң культура хемчеглери эрттирер кол бажыңынга чаңгыс-даа капиталдыг септелге чоруттунмаанын сагындыраал. Культураның эргижирээн оран-савазын “Культура” федералдыг национал төлевилелдиң болгаш ТР-ниң Чазак Даргазы Владислав Ховалыгның деткимчези-биле ону долузу-биле чаартыр аргалыг болган. Септелге ажылын аңгы-аңгы деңнелдиг бюджеттен 15 сая рубльди аңгылааш, чоруткан.
Көдээ Культура бажыңының соңгалары, эжиктеринден эгелээш, иштики-даштыкы хевирин чаартырындан аңгыда, инженер четкилерин шуптузун солуп чаарткан. Ол ышкаш көрүкчү залын амгы үеге дүүштүр кылган база фойени делгемчиткеш, чогаадыкчы ажылдарга аңгы кабинеттерни дерээн. Оон аңгыда, чаа үн, чырык аппаратураларын, чаа эт-септи салган.
Чаарттынган Культура бажыңының байырлыг ажыдыышкынынга Барыын-Хемчиктиң Национал театрының артистери театржыткан оюн-көргүзүү-биле аалчыларны уткуп киришкен. Аңаа ТР-ниң культура сайыды Виктор Чигжит четкеш, чыылганнарга байыр чедиргеш, септелге ажылынга идепкейлиг киришкеннерге четтиргенин илереткен.
Чаарттынган клубтуң көрүкчү залын долдур олургулапкан аалчыларга Кызылдың уран чүүл колледжизиниң студентилери болгаш бот-тывынгыр артистери солун концертин, оюн-көргүзүүн бараалгаткан.
Бистиң корр.
Чурукту интернет четкизинден хоолгалаан.
“Шын” №83 2024 чылдың октябрь 30
