Кызыл хоорайның 4 дугаар школазы 2025 чылда тургустунгандан бээр 80 чылдаан юбилейин, а школаның оран-савазы туттунгандан бээр 50 чыл болган оюн демдеглээр.
Школаларга капиталдыг септелге чорудар федералдыг программаже Кызылдың 4 дугаар школазы 2024 чылда кирген. Апрель 1-ден ноябрь 29-ка чедир капиталдыг септелгени ук школага чоруткан. Септелге үезинде школаның өөреникчилери Кызылдың 2 болгаш 19 дугаар школаларынга түр үеде өөренип турган.
Школаның капиталдыг септелгези доозулган, декабрь 10-да байырлыг ажыдыышкыны болган. Аңаа ТР-ниң Чазааның Даргазының оралакчызы Орлан Сарыглар, ТР-ниң өөредилге сайыдының хүлээлгезин күүседип турар Ренат Ооржак болгаш өскелер-даа аалдап келген.
ТР-ниң Чазааның Даргазының оралакчызы Орлан Сарыглар:
– «Школаларның капиталдыг септелгези» федералдыг программага киришкеш, бүрүнү-биле чаарттынган школаларның 46 дугаары болдуңар. Чаарттынган оран-савалыг болганыңар дээш байыр чедирип тур мен, хүндүлүг башкылар болгаш өөреникчилер! Школаның септелгезинге үлүүн киириштирген кижи бүрүзүнге өөрүп четтиргенивисти илередир-дир бис. Чаарттынган школа уругларның өөредилгеже тура-соруунуң үнер дөзү болур болзун!
«Тывада 4 каът оран-савалыг чаңгыс школа болгай. Ол 1975 чылда туттунган. Каш хонук бурунгаар Владислав Товарищтайович-биле кады маңаа кээп чордувус. Ол школаның шупту кабинеттерин кезип көргеш, бо школага өөренип, секциялап чораанын чугаалады. Шынарлыг ажылы дээш тудугжу Орлан Бавууевичиге Өөредилге яамызының өмүнээзинден четтиргенивисти илереттим. Уругларга болгаш башкыларга ОГЭ, ЕГЭ күрүне шылгалдаларында эки демдектерни күзеп, тиилелгениң тугун тыпсып тур мен» – деп, өөредилге сайыдының хүлээлгезин күүседип турар Ренат Ооржак чугаалады.
Капиталдыг септелге программазынче кирер дээш, дыка үр үе дургузунда белеткенгенин 4 дугаар школаның директору Наталья Масленникова чугаалады: «2022 чылда-ла документилерни белеткеп эгеледивис. Ийи чыл дургузунда школавыс экспертиза эрткен. 2023 чылдың декабрьда школавысты ук программаже киирер дугайында Москвага атты салган. Ооң мурнунда школага изиг суг чок турду, а ам изиг-соок суг бар. Спортчу залдың бирээзин ортузундан өрээлдээш, хүрежир залды база немей кылгаш, эрткен чылын ажыдыптарывыска, баштай 3 кижи хүреш секциязынга кээп эгелээн, чоорту бир неделя болганда, 30 ажыг оолдар, уруглар немешкен. ТР-ниң Чазаанга, ТР-ниң Өөредилге яамызынга, Кызыл хоорай чагыргазынга, Кызыл хоорайның өөредилге талазы-биле департаментизинге болгаш ажылды хүлээнгеш, эчизинге чедирген тудугжуларга улуу-биле өөрүп четтиргенивисти илередип тур мен. Школавыста 986 уруг өөренип турар. Сентябрьның санаашкыннары-биле алырга, школага 17 башкы херек турган болза, амгы үеде 12 башкы чедишпейн турар».
Оюмаа Сат, 4 дугаар школаның химия башкызы:
– «Өөредилге» федералдыг программаның деткимчези-биле химия кабинеди бүрүнү-биле чаарттынган. Лаборатория кылырынга херектиг тускай чаа парталар, шкафтар дээш дериг-херекселивис шупту чаа. Уруглар-биле ажылдаарынга кончуг таарымчалыг байдалдар тургустунган. Химия кичээлдери ооң мурнундаазындан артык сонуурганчыг болуру чугаажок. Улуу-биле четтирдивис.
Капиталдыг септелге үезинде 4 дугаар школаның өөреникчилерин хүлээп алгаш, өөредип турган Кызылдың 2 болгаш 19 дугаар школаларынга өөрүп четтириишкин бижиктерин Наталья Масленникова тывыскан.
«2022 чылдан эгелеп бо школага өөренип эгеледим. Школавыс дыка чараш, амгы үениң негелделери-биле дүүштүр чаарттынган-дыр. Чаа дериг-херекселдерни көргеш, магадап турдувус. Мындыг чараш школага өөренири эптиг-даа, аянныг-даа болур ужурлуг. Класста 26 кижи өөренип турар бис» – деп, 4 дугаар школаның 9-ку клазының өөреникчизи Анжела Ондар өөрүшкүзүн илеретти.
Столоваяның чем кылыр черин улгаттырган. Чемненир зал амгы үениң дериг-херексели-биле дериттинген, улуг, делгем залга хары угда 90 кижи олурупкаш, чемненип болур.
Айдың ОНДАР.
Буян ООРЖАКТЫҢ тырттырган чуруктары.
“Шын” №95 2024 чылдың декабрь 11
