РФ-тиң Президентизиниң бот-идепкейи-биле үндүрген «Школа системазының өөредилгезиниң чаартылгазы» деп федералдыг программа езугаар 2022 чылда регионнуң 27 школазынга капитал септелгени чоруткан.
Ол школаларның бирээзинге Чадаананың 3 дугаар ортумак школазы хамааржыр. Эрткен неделяда сургакчылаашкын үезинде септеттинген школаны көрүп четтивис.
Дашты-иштин шевергин кылдыр кылган чаңгыс каът школаны 1958 чылда-ла туткан болду. Эрткен чылын бо школага капитал септелгени кылганы ол. 2022 чылдың сентябрь 1-де уруглар чаарттынган школаже өөренип кирген, деп школаның директору Людмила Сегленмей таныштырып чугаалады.
Часкы дыштанылга үези болгаш, школа ишти ээн, чүгле спорт залда уруглар ойнап турар. Школаның ишти-дашты арыг-силиг, чылыг, чырык. Фойезинде өөреникчилериниң чедиишкиннерин көргүскен шаңнал-макталдарын, кубоктарын хөйү-биле делгээни онзагай.
— Бистиң школавыс дыка улуг эвес, ында 623 школачы өөренип, 53 башкы башкылап турар. 250 өөреникчиге санап каан школада амгы үеде 600 уруг өөренип турар. Ычангаш 2 ээлчегде өөренип турар бис. Эрги школавыс арай-ла хевир чок турган, федералдыг төлевилелдиң ачызында школавыс чаарттынган. 10 кабинетти бүрүнү-биле чаарткан: эжиктерин, соңгаларын солаан, чаа дериг-херекселдер-биле шимээн. Ол ышкаш спорт залдың база шалазын, соңгаларын солаан. Бо чылын спортчу шөлдү база чаартырын планнап турар. Өөреникчилер, ада-иелер база школаның коллективи дыка өөрүп тур бис — деп, директорнуң өөредилге-кижизидилге талазы-биле оралакчызы Диана Монгуш чугаалады.
Капитал септелге мурнунда, 2020–21 чылдарда, доозукчуларының, ада-иелерниң база коллективтиң ачы-дузазы-биле школага немей тудуг кылып алганын Диана Өнер-ооловна дыңнатты: «Бо немей кылып алган тудуувусту езулуг чоннуң тудуу деп адап болур. Ында ам 4 өөренир кабинет, 2 администрация өрээлдери немешкен. Ынчангаш бо тудугга киришкен бүгү-ле чонувуска четтиргенивисти илередир-дир бис».
Башкылар септеттинген школазын таныштырып, чедиишкиннерин чугаалап тура, тудугну кылган хүлээникчи организацияның талазындан четпестерни база көргүстү: кичээлдээр кабинеттерде өрээлдер аразынга салыр хээрек эжиктер салып каан, кабинеттер аразының ханалары чуга, ишти хос. Септелгени кылган хүлээникчи организация акша-хөреңгиниң чедишпээнинге чылдагааннап каанын школаның башкылары чугаалады.
Республиканың Өөредилге яамызындан, чазак-чагыргадан төлээлер кээп, бо айтырыгны көдүрүп, шиитпирлээр дээрзинге школаның башкылары бүзүреп турар.
/Алдынай СОЯН.
"Шын" 2023 чылдың апрель 5 №24
#Шынсолун #Тыва #Өөредилге #Чадаана
