Эрткен хүннерде Чадаанага барыын зонаның – Мөңгүн-Тайга, Өвүр, Сүт-Хөл, Чөөн-Хемчик кожууннарның 100 ажыг башкылары болгаш дагдыныкчылары чыглып, эрткен чылда чарлаттынган Башкының болгаш дагдыныкчының чылын түңнеп хуралдаан.
Аңаа Тыва Республиканың Чазак Даргазы Владислав Ховалыгның мурнундан ооң оралакчызы Алик Монгуш чыылганнарга байыр чедиргеш, шылгарааннарга шаңналдарны тывыскан.
Чазак Даргазының Өөрүп четтириишкин бижиин Мөңгүн-Тайганың Мугур-Аксының 1 дугаар школазының тыва дыл болгаш чогаал башкызы Чодураа Кара-Сал, Чадаананың 3 дугаар школазының чурулга уран чүүлүнүң башкызы Ольга Кенден, Сүт-Хөлдүң Ишкинден “Хүнчүгеш” уруглар садының кижизидикчи башкызы Валерия Ооржак, Сүт-Хөлдүң Алдан-Маадырдан төөгү башкызы Елена Ооржак болгаш Чадаананың 3 дугаар школазының күш-культура башкызы Орлан Сатка тывыскан.
Хөй чылдар дургузунда өөредилге адырынга эки ажылы дээш Чазак Даргазының Хүндүлел бижии-биле Сүт-Хөлдүң Кара-Чыраада “Челээш” уруглар садының кижизидикчи башкызы Лариса Донгак, Мөңгүн-Тайганың Мугур-Аксында 1 дугаар школазының ОБЖ башкызы Юрий Доштуг-оол, Сүт-Хөлдүң Бора-Тайгада төөгү башкызы Марина Ондар, Сүт-Хөлдүң Суг-Аксында “Чинчи” уруглар садының санитар нянязы Чечек Ондар, Сүт-Хөлдүң Кызыл-Тайгадан орус дыл болгаш чогаал башкызы Яна Ондар, Мөңгүн-Тайганың Мугур-Аксының 1 дугаар школазының сан башкызы Уран Сүрүңмаа шаңнатканнар.
Чарлаттынган чылды түңнээн хуралга ТР-ниң Өөредилге яамызының мурнундан күрүне шаңналдарын дөрт кожууннуң өөредилге албан черлеринде үре-түңнелдиг ажылдап чоруур башкыларга, дагдыныкчыларга тывыскан.
Башкының болгаш дагдыныкчының чылын республиканың өске дөрт зоназынга – Каа-Хемниң Сарыг-Сепке, Улуг-Хемниң Шагаан-Арыгга, Таңдының Бай-Хаакка болгаш Ак-Довурак хоорайга байырлыг байдалга түңнеп, хагганын сагындыраалы.
Бистиң корр.
Ада ТЮЛЮШТУҢ тырттырган чуруктары
«Шын» №5 2024 чылдың январь 24
