Чагыгларны хүлээп ап эгелээн

Тыва Республикага турисчи инфраструктураны хөгжүдериниң талазы-биле грантылар мөөрейинге киржилгеге чагыгларны хүлээп ап эгелээн.

Туризм талазы-биле агентилелдиң тодаратканы-биле алырга, субсидия хевирлиг грантыларны «Туризм болгаш аалчызырак чоруктуң индустриязы” национал төлевилелдиң иштинге хемнерниң, хөлдерниң, суг шыгжымырларының болгаш өске-даа суг объектилериниң эриктеринге улус эштир черлерни тудуп-тургузары болгаш сайзырадыры, а ол ышкаш национал турисчи кокпаларны тургузары база хөгжүдери угланыышкыннар талазы-биле тыпсыр.

Грант деткимчезиниң баштайгы угланыышкынынче РФ-тиң национал үлегер-майыктарының негелделеринге дүүштүр улус эштир черлерниң чаагайжыдылгазы нургулайында кирип турар. Бо угланыышкынның төлевилелдери 10 сая рубльдиң деткимчезинге кордап болурлар.
Ийиги угланыышкын национал турисчи кокпалар-биле чергелештир турисчи курлавырларны чаагайжыдарын база чаартырын көрүп турар. Ынаар 6,7 сая рубльди углаар.

Эрткен чылын төлевилелдерниң грант деткимчезинче кирип турар 44 регионнуң санынче Тыва киргенин сагындырып каалы. Күрүнениң саң-хөө деткимчезиниң ачызында бараалгадып турар сервистиң шынары регионга бедиир, туристерниң саны көвүдээр деп санап турар. Тываның сайгарлыкчылары боттарының эгелээшкиннерин боттандырарынга 43 сая ажыг рубльди алырлар.

Грант акшазын алырынга кордакчылардан чагыгларны апрель 30-ге чедир хүлээр. Аңаа хамаарышкан тодаргай медээни Туризм талазы-биле агентилелдиң дараазында адрезинден ап болур:
Кызыл хоорай, Кызыл партизаннар кудумчузу, 18 В («Туризм бажыңы»), 2-ги каът, 4 дугаарлыг өрээл.
Тел.: 8 (39422) 3-44-33, электроннуг шуудаң: otdeltourizm@yandex.ru

"Шын" 2023 чылдың апрель 5 №24

#Шынсолун #Тыва #ТываРеспублика #Туризм#Грант