Май 12-де «Тываның буянныг чүректери» деп аныяктар шимчээшкининиң идепкейжилери Күрүнениң аңныыр хайгаарал комитеди болгаш Таңды кожууннуң чагыргазы-биле республика чергелиг бойдустуң тураскаалдыг кезээнге хамааржыр Чагытай хѳлдүң эриин дургаар экологтуг субботникти эрттирген.
«Далай деңнелинден 1005 м бедикте турар Чѳѳн Таңды-Уула сынның соңгу эдээнде, Кызыл хоорайдан 70 хире км черде турар Чагытай хѳлдүң эриинде боктарны аштап-арыглаарынга дузалаштывыс. Бо хѳл Тываның тѳп кезээнде турар болгаш, Тываның ыйгылааш черинде турар эң-не арыг хѳлге хамааржыр» — деп, шимчээшкинниң киржикчизи Артыш Монгуш чугаалаан.
Хөлдүң чоогу кезек девискээр билдингир дыштанылга чери. Аңаа дыштанып келген чон боттарының тоомча чок чоруу-биле чараш бойдузувусту хирлендирип, шилдер, пластик савалар, кылагар хаптар дээш дыка хѳй боктарны арттырып каап турары дыка хомуданчыг.
«Күзелдиивис-биле киришкен бо хүнгү акцияның кол сорулгазы – кайгамчыктыг чараш бойдузувусту камгалаары болгаш бистиң чуртувустуң хоорайлар, суурларының бүгү чурттакчыларынга бойдус-байлаавыска ынак болурун, ону хумагалаар чорукту оттурары болур. Бистиң хөлдеривис, бойдузувус арыг-силиг болгаш ажаалгалыг болурун күзеп тур бис» деп «Тываның буянныг чүректери» шимчээшкининиң идепкейжилери санап турар.
#Шынсолун #Тываныңбуянныгчүректери #Таңды_уула #Таңдыкожуун #Тыва
