Эрткен дыштаныр хүннерде Чагытай хөлдүң эриинде «Орлёнок» лагеринде дыштанып турар уйнуувуска ужурашпышаан, эштип, агаарлап алыр дээш четтивис. Хөлдүң эриин дургаар майгыннарлыг одагланган улус-ла хөй болду. Хөлүвүс-даа чараш, арыг, суу чылыг, амырап эштип, дыштанып хүнзээн бис.
Кежээ дүжерге, хөлзээзин-даа эгелээн: ыры-хөгжүм, танцы-сам, алгы-кышкы. Дыштаныкчыларның шуптузу эвес-даа болза, хөй кезиинде аныяктар шимээргеп турар. Бир майгын кыдыында мырыңай чогуш-содаа-даа болуп турар. Хөлдүң девискээринде полиция ажылдакчылары азы патруль деп улус-даа көзүлбеди. Ынчалдыр шимээнниг черге орта удувайн хондувус.
Даң бажында шыпшың апарган. Ынчан харын бичии удуп алдывыс. Хүндүс база колдуу ындыг, ында-мында эзириктер дөмей-ле бар-дыр. Эзирик улус хөлге эштирге, айыылдыг болгай, дүже берип болур. Кижи дүшкен таварылгалар, ылаңгыя Чагытайга хөй болган ийик.
Чурумнуг кижилер дыштанган богун аштап-арыглааш чоруур боор чорду. Бис база богувусту хаптарга чыггаш, хоорайга келгеш, контейнерже октаптывыс. Ындыг-даа болза хөлдүң эриинде кайда хөй кижи бар, ында бок хөй боор-дур. Турисчи баазалар девискээрлери харын чурумун, арыг-силиин хайгаарап турар, ээлиг деп билдингир.
База бир бижиксээн чүүлүм – хөл девискээринде арыгланыр черлерниң чогу. Улусту көөрге, одагланган черлеринден бичии ырадыр хараганнар аразынче-ле кылаштажып турар боор-дур. Ол кезек черлерниң хараганнарын чемишчидип турар хире. Чагытай хөлдүң девискээринге арыгланыр черлерни көвүдедир кылыры күзенчиг-дир.
Улуг хөлге уруг-дарыг-даа дүже берип болур, чогуш-содаа-даа болуп турар, ынчангаш корум-чурум тудары-биле, ылаңгыя дыштаныр хүннерде полиция ажылдакчыларының болгаш камгалакчыларның ажылын күштелдирзе кандыг чүвел?
Антонина МИЖИТ, культураның хоочуну.
Кызыл хоорай.
Чурукту интернеттен хоолгалаан.
“Шын” №29 2025 чылдың июль 31