Таңды кожууннуң девискээринде дыштанып, эштип база балыктаарынга таарымчалыг Чагытай хөлдүң эриинге 4G харылзаа четкизин тургускан. Дүрген дамчыыр 4G четкини МТС оператору бир дугаар ында тургусканы ол.
Чагытай хөл Кызыл хоорайдан 100 километр черде турар, Таңды-Уула сыннарының эдээнде чаттылган делгем болгаш ханы, дус чок хөлдерниң бирээзи. Ынаар кижилер дыштанып, эштип база балыктаар дээш хөй барып турар. Хөлде сөөктүг-балык (язь), шортан, пелядь, лещ, карп деп балыктар бар.
Чагытай хөлдүң эриинде турбаазаларга дүрген дамчыыр интернет таарымчалыг дыштанылганы тургузар. Чөөн Таңды-Уула сыннарының эдээнде «Металлург», «Байлак», «Орлёнок», «Чагытай» лагерлеринде дыштанып турар уругларга база дүрген дамчыыр интернет дыка ажыктыг. 4G четкини тургузуптарга, дыштаныкчылар чоок кижилери-биле харылзажып, фото-чуруктар болгаш видеоларын социал четкилерге салып, онлайн фильмнер көөр аргалыг апарган.
«Республиканың эң-не онзагай, чараш черлериниң бирээзинде турисчи инфраструктура сайзырап эгелээн. Эрткен чылын хөлдүң дыштанылга зоналарының электрижидилгезин дооскан. Ында чай-кыш дивес ажылдаар аалчылар бажыңнарын туткан, бо сезонда пляжты дерип, тургускан. Чоокку үеде инвестициялыг комплекстиг төлевилел-биле Чагытайның эриинге бүдүн турисчи кластер тыптып келир. МТС бодунуң ээлчээнде, хөлге харылзааның инфраструктуразын тургузар. Ам бо үеде дыштаныкчылар дүрген дамчыдар мобильдиг харылзааны ажыглап эгелээн, а бизнес — онлайн төлевирлерни болгаш өске-даа чурагайлыг сервистерни ажыглап эгелээн» — деп, Тыва Республикада МТС-тиң директору Экер Хертек чугаалаан.
Эрткен чылын мобильдиг операторлардан бир дугаар МТС республикада сураглыг дыштаныр черлер — Дус-Хөл биле Хадыңга 4G четкини тургускан. Харылзаа инфраструктуразы Тывага бедик деңнелге ажылдаарынга белен.
«Шын» №46 2024 чылдың июнь 22
