Тываның күрүне университединде VIII Чагытай эртем-шинчилел конференциязы ажылын эгелей берген. Эртем-шинчилел шуулганының кол кезээ Таңды-Уула эдээнде, Чагытай хөлден ырак эвесте, онзагай чараш черге эртер. Конференцияның хуралдаар кезээ төнерге, киржикчилер Таңды кожуунче үнүпкен.
Ол кадында ТывКУ-нуң «Буревестник» дыштанылга баазазын университеттиң бөлүк волонтерлары болгаш башкылары девискээрин аштап-арыглааш, конференцияның ажылдаарынга тарымчалыг байдалды тургузуп берген.
ТывКУ-нуң баазазында мобильдиг харылзаа болгаш интернет ажылдап турар. Студентилер болгаш аныяк эртемденнер zoom харылзаа таварыштыр илеткелдерни дыңнап эгелей берген.
Конференция үезинде аныяк шинчилекчилерге «Школа-семинар» база болур.
Шуулганның программазында хөй-ле солун, онзагай хемчеглер бар: тренингилер, мастер-класстар, практикумнар, оюн-викториналар, төлевилелдер таныштырылгазы.
Шуулганның төнчүзүнде конференцияның аалчыларынга Тываның онзагай чараш бойдузун көргүзери-биле, Дүрген хем унунга болгаш хөлдерге чедирер.
Бистиң корр.
