Чөөн-Хемчик кожуунда Теве-Хая, Чыраа-Бажы сумулары эң-не хөй чурттакчылыг сумуларга хамааржыр. Чоннуң амыдыралы эки, ногаа ажаап, мал-маганын тудуп, кат-чимизин чыып, сиген-ширбиил дээш ажыл-иш сумуларда хайымныг чоруп турар.
Бо сумуларда херээженнер чөвүлелдериниң ажылы көскү деп болур. Теве-Хая сумузунуң чагырга даргазы Мындырья Донгак социал политика талазы-биле оралакчы даргазы Баяна Мирчин, Чыраа-Бажы сумузунуң чагырга даргазы Радион Ооржак, социал политика талазы-биле оралакчы даргазы Шеңне Донгак сумуларның херээженнер чөвүлелдерин кезээде деткип, аразында демниг сырый харылзаалыг ажылдап чоруурун демдеглээр апаар.
Чоокта чаа, август 4-те, Хөндергей сумузунуң Кызыл-Өс деп тайгада чайлагга, Теве-Хая сумузунуң Херээженнер чөвүлелиниң даргазы Наталья Николаевна биле Дактан Досумович Донгактарның аалынга "Тыва чараш чаңчылдарывысты салгалдарга эгидээли" деп келир үеде өзүп олурар чаштарга, аныяк салгалывыска өөредиглиг мастер-классты чоруткан.
Ооң программазы онзагай: хой дүгү болгаш тараа дугайында кыска видео-тайылбырлар, хой ишти-хырнын арыглап-аштаары база 40 минута дургузунда хураган кыргыыр мөөрей.
Сөөлгү үеде тыва чонувус дүк дыдар, тараа хоорар, соктаар, челбиир, тарааны дээрбелээр, хой кыргыыр, хойнуң ишти-хырнын аштаар деп чүүлдерни уттуп бар чорууру чажыт эвес болгай.
Мастер-класска херээженнер чөвүлелдериниң кежигүннери, идепкейжилер Уран Сонам, Кара Нассык-оол, Наталья Донгак, Гита Ооржак, Олча Ховалыг, Лилия Куулар, Шончалай Ондар, Дамырак Донгак, Аида Куулар, Чечек Куулар, Снежана Владимировна, Аржаана Куулар, Баяна Алексеевна киришкен.
Мастер-классты эрттирип келген Херээженнер чөвүлелиниң даргазы Н.Н. Донгак кежигүннериниң ажылгыр, оюн-баштак талантылыын, ажылынга бердингенин, сонуургалдыын, чаңгыс удаа эвес, бо чылын үш дугаар мастер-класс эрттирип турарын демдеглээн.
Теве-Хаяның Херээженнер чөвүлелиниң кежигүннери өске-даа сумулар-биле арга-дуржулга солчуп, аалдажып чедер бис деп демниг харыыладылар.
Теве-хаяжыларга бисти чалап, катай солун мастер-классты эрттирип, ойнап дыштанып алганывыска улуу-биле өөрүп четтиргенивисти илереттивис.
/ Уран СОНАМ,
Чыраа-Бажы сумузунда кижизидикчи башкы.
“Шын” №65 2024 чылдың август 28
