Чайын хөмүр-даш складтары ажылдаар бе?

Май 15-те республикада одалга сезону доозулган. Чүгле Хову-Аксында агаар-бойдустуң ам-даа соок болганы-биле одалганы майны төндүр уламчылаар.

Одалга сезону доозулган-даа болза, чонну хөмүр-даш айтырыы дүвүредип турар. Чүге дээрге изиг чайның чылыг хүннери саадатпайн эрте бээрге, база катап-ла соок кыш дүжер болгай. Ынчангаш чайгы үеде хөмүр-даш складтары ажылдаар бе деп айтырыг чонну дүвүредип турар.
Тургустунуп келген айтырыгга тодаргай харыыны бээри-биле ТР-ниң одалга болгаш энергетика сайыдының хүлээлезин күүседип турар Эдуард Куулар-биле харылзаштывыс.
«Республикада ниитизи-биле 33 хөмүр-даш склады бар. Чайгы үеде олар шупту деңге ажылдавас, ынчалза-даа кожуун бүрүзүнге бир склад албан ажылдаан турар ужурлуг. Кызыл хоорайда бар 8 скаладтың 3-ү чайны чайладыр ажылдаар».

«Чайын – шанааң, кыжын – тергең белетке» деп чон аразында тараан үлегер домакта дег, одалга сезону доостурга-ла, угаанныг улус дараазында кышка белеткел ажылдарын эгелей бээр.

Айдың ОНДАР.
Чурукту интернет четкизинден алган.