Январь 10-дан 13-ке чедир Москвага ат-сураглыг Национал «Щелкунчик» шаңналының мөөрейи болуп эрткен. Бүгү Россияның 200 ажыг бөлүктериниң эң-не тергиин ат дээш демиселинге ыры болгаш танцы-самның “Салгал” студиязы бирги черни чаалап алган.
Бо чылын бүгү чурттан дөрт муң ажыг чалыы артистер ол мөөрейге киришкен. Тургустунгаш чүгле үш чыл болган «Салгал» ыры болгаш танцы-сам студиязынга улуг төлевилелге киржири ёзулуг шылгалда болган. Ынчалза-даа “Салгал” студиязы салым-чаяан болгаш сагылга-чурум кызыгаар чок дээрзин бадыткаан. Өөреникчилер ийи улуг шаңналды: бирги чаданың лауреадының дипломун база тургускан көргүзүүнүң бот-тускайлаң онзагайы болгаш артистерзии дээш «Сценаның эң эки овур-хевири» деп жюриниң тускай шаңналын эккелген.
Амгы үеде “Салгал” студиязында чүс хире өөреникчилер классиктиг хореографиядан эгелээш, ыры болгаш модель талазынга чедир аңгы-аңгы угланыышкыннарда кичээлдеп турар. Киржикчилер боттары белеткел берге болганын, улуг сценага ойнаарда, сеткилинден бердинери кол негеттинип турганын демдеглээн.
Февраль айда “Салгал” Казань хоорайже, а чазын «Россияның школачы чазы» фестивальдың шилилге чадазынга киржирин планнап турар.
Бистиң корр.
Чурукту Республиканың улусчу чогаадылга төвүнден алган.
“Шын №2 2025 чылдың январь 22
