5 харлыг Диана:
– Ойнаар-кыстан садып берем, авай.
– Дүүн садып берген ойнаарагым бар ышкажыл, ам чүгле төрүттүнген хүнүңде садып бээр мен, акша чок-тур, хүннүң-не ойнаарак садар.
– Банкада акшаң бар ийик чоп.
🙂
4 харлыг Ай-Херел ачазынга хоптанган:
– Ачай, акым мени эттеп турду…
– Канчаар?
– Думчуумче шанчыптарга, дыка хөй ногаан хан төгүлдү…
🙂
Бичии Айдыс дустуг огурецти ызырыпкаш:
– Дус-Хөлге эштип турган огурец-тир аа.
(Ада-иези-биле Дус-Хөлдеп чораан турган).
🙂
Бичии Ноян авазындан айтырган:
– Мен каш харлыымда төрүттүнүп келген кижи мен, авай?
🙂
Ноян бичиизинде дөскелчок. Үүлгедирге-ле, авазы оглун азыгга тургузар. Ноянга ол солун болуушкун турган. Бир катап ооң угбазы Саша тениирге, азыгга тургузуптарга, бичии Ноян халып келгеш:
– Азыг мээң – деп-тир.
🙂
Бичии Ай-Кат кырган-авазындан айтырып-тыр:
– Куштар чүге чүглүг болурул, кырган-авай?
– Олар чүглер чок болган болза, чараш эвес болурлар-дыр, уруум.
Ай-Кат кезек үе иштинде бодангаш:
– Сеңээ база чүглер турган болза аа, кырган-авай – дээн.
🙂
Дөрт харлыг Дарина:
– Терек чүге кээп ушканы ол? Ол медерелин ышкыныпканы ол бе?
🙂
Санчай кырган-ачазындан айтырган:
– Нойнуң кораблинге сен кады чордуң бе, кырган-ачай?
– Чок, оглум.
– Бир эвес аңаа турбаан болзуңза, сугга канчап дүже бербээн кижи боор сен.
“Шын” №34 2026 чылдың сентябрь 3
Чурукту ГигаЧатка чураан.
"Шын" солуннуң МАХ-каналынга каттыжыңар: max.ru/channel_shyn