Чиигелделиг ипотека дугайында чонга делгереңгей тайылбыр ажылын кылыры-биле «Регионстрой» КХН-ниң чиңгине директорунуң оралакчызы Валерия Сарыглар-биле чугаалаштым.
– Спутник девискээринде «Взлетная» микрорайонунда монолит материалдан тос каът, ийи улуг эжиктиг хөй квартиралыг бажыңны тудуп турар бис. 2024 чылдың декабрьда бажыңны хүлээдири планда көрдүнген. Бир, ийи, үш өрээлдиг болгаш студия 29-тан 71 дөрбелчин метрге чедир квартиралар бар. Квартира бүрүзү ийи хевирлиг.
Чижээлээрге, студия квартира ийи хевирниң, чаңгыс өрээл квартира база ийи аңгы хевирниң болур. Чер шимчээшкининде эң-не айыылдыг регионнарның санынче Тыва кирип турар. Сес балл чеде бээр деп шупту билир бис. Ынчангаш ону өөренип көрбүшаан, эң-не быжыг материалдардан хөй квартиралыг бажыңнарны «Регионстрой» тудуп турар.
Бо хүннерде чаңгыс бажың тудуп турар бис. Удавас, чартык ай хире болгаш, ийи дугаар бажыңның тудуун эгелээр. Бажың бүрүзүнде 162 квартира бар. Ипотека-биле кайы-даа квартираны садып ап болур. "ДОМ РФ-те" аккредитацияны эртип алган бис. Сбербанк, Росбанк, Промсвязьбанк дээш бо үш банкыга баргаш консультациялап болур. «Регионстройнуң» бодунда база садыг-саарылга килдизи бар. Хостуг квартираларга хамаарышкан айтырыгларны келгеш азы долгааш айтырып болур.
Чиигелделиг ипотека программазы-биле удавас ажылдап эгелээр бис. Бир эвес банкыга ипотеканы эрттиртип алган болза, биске келгеш квартираны шилип алыр. Ипотека алырда, бир-ле дугаарында, банкыга баар. Ынчалза-даа кайы хире акшага кандыг квартира алырын билип алыр дээш, баштай бистен консультацияны ап болур.
РФ-тиң Тудуг яамызының бадыткааны өртектер-биле бир дөрбелчин метрде 115 муң рубльга садып турар бис. Чижээлээрге, 29,30 дөрбелчин метр шөлдү 115 муңга көвүдедиптерге, 3 сая 370 ажыг муң рубль болур. Садып алыксап турар бажыңыңарның шөлүнден каш акша алырыңар хамааржыр. Кызыл хоорайда бажың өртээнге деңнээрге, «Регионстройнуң» өртектери эң-не чиик. Ийи бажыңда 300 ажыг квартира бар болза оларның 80 ажыы чиигелделиг ипотека программазы чокка-ла саттына берген.
«Регионстройдан» бажың садып алыр күзелдиглер 89833690001 телефон дугаарынче (Рудик Эдуардович) долгааш чугаалажып болур.
Айдың ОНДАР белеткээн.
«Шын» №67 2023 чылдың сентябрь 9