Бистиң ада-иевис колхоз-совхоз үезинде шээр-даа, бода-даа мал кадарып, хаваннар-даа азырап чордулар. Бии-Хем кожууннуң Тарлаг, Чкаловка фермаларынга, ырак-чоок одар-белчиирлеринге малчыннап чорааннар.
Ачамны Санаа Шойнамович Маады, авамны Көк-кыс Сумбаевна дээр. Ол үелерде боттарынга бир-ийи хире-ле инектер тудар, ажыл төлевири-даа чегей болгай. Бир коданга 300 хире мал бажы турар. Норма-чижээ ындыг деп, зоотехник үргүлчү хынап турар. Амгы үеде малды муң чедирип турар дээрге кайгаар кижи-дир мен. Чазын мал оъткарып эгелей бээрге, кылын харны аътка далбый сөөртүп алгаш, чугаладыр эжип кааптар чораан. Чамдык чудаан инектерни кудуруундан көдүрүп-даа тургузуп турар боор чүве.
Март айда мал оолдап эгелей бээрге, бачым үе келир. Мал чеми база эвээжей бээр. Кажаа агаарладып аштаар, көржең коптарар дээш ажыл-ла хөй. Дуза-ла херек. Ол бүгүнү ыыт чок кылып-ла турар, удуур-чыдар чай-даа кайда боор.
Мен ол үеде школачы, оон студент турган болгаш, чүгле дыштанылга үезинде-ле дузалажыр аргалыг мен. Хөөкүй ада-иевис бистерни, ажы-төлүн, беш кижини өөредип алыр дээш, дыка-ла кызып чорааннар. Мен бодум 6–7 чыл эмчи институдунга өөренип дооскаш, 40 чыл ажылдап кагдым. Кыраан ада-иевисти кады төрээннер чанывыска ажаап-тежээп чордувус.
Бо үениң ажы-төлүнге чедиишкиннерни күзевишаан, ада-иезинге дузалажып, оларны бодап, хүндүлеп чоруурун чагыыр-дыр мен.
Татьяна КЫЗЫЛ-ООЛ, хоочун эмчи.
Кызыл хоорай.
“Шын” №21 2024 чылдың март 20