Тывада өрттер өжүреринче хаара туттунган бөлүктерниң, ооң иштинде эки турачы өртчүлер дружиналары болгаш федералдыг Авиаарга-арыг камгалалының күштери көскү үре-түңнелдерни берген. Май 12-ниң эртенинде, Тывада Каа-Хем биле Таңдының арга-арыг ажыл-агыйларында ниитизи-биле 450 гектар черде ийи арга-арыг өрттери хып турар. Ол эрткен хүнге деңнээрге, беш катап эвээш. Ийи өрттү шуут өжүрген.
«Агаар медээзинден алырга, хаттыг болгаш изиг-даа болза, бо неделяда сериидеп, чаъстаар болганындан байдал экижиир ужурлуг деп идегеп турар бис» – деп, республика Баштыңы Владислав Ховалыг дыңнаткан. Шупту өрттерни бүрүнү-биле өжүрген соонда, регионалдыг онза байдал чуруму соксаарын ол чугаалаан.
Авиаарга-арыг камгалалының, арга-арыг өрттеринге удур албанның өртчүлери, эки турачылар болгаш федералдыг курлавырдан специалистер дээш, 270 хире кижи өрт-биле демисежип турар. Ол ышкаш 32 санныг техника аймаан хаара туткан.
Сөөлгү хонукта Барыын-Хемчик биле Сүт-Хөл кожууннарда өрт өжүрүкчүлери 1728 гектар ниити шөлдүг ийи арга-арыг өрттерин бүрүнү-биле өжүрген.
Республикада өрт сезону эгелээнден бээр 5 муң ажыг гектар ниити шөлдүг 38 арга-арыг өрттери бүрүткеттинген.
Тывада өртке удур тускай чурум хевээр арткан. Майның 24-ке чедир чурттакчы чоннуң болгаш транспорт аймааның арга-арыгже кирери хоруглуг. Бичии-ле көстен азы чедир өжүртүнмээн таакпы артынчызындан безин улуг өрт үнүп болурун специалистер сагындырган.
/ Бистиң корр.
Чурукту ТР-ниң Чазааның парлалга албанындан алган.
“Шын” №18 2026 чылдың май 14
"Шын" солуннуң МАХ-каналынга каттыжыңар max.ru/join/egenQ...