Каа-Хем кожууннуң Бүрен-Хем сумузунуң «Солнышко» уруглар садының белеткел бөлүүнүң чаштарын «Орлята-дошколята» Бүгү-российжи бичии уруглар шимчээшкининиң кежигүнүнче байырлыг езу-биле киирген.
«Орлята-дошколята» бичии уруглар шимчээшкининиң программазының Тывада регионалдыг куратору Сергей Лопсан чаштарга байыр чедирген.
Кижизидикчи башкылар болгаш ада-иелер чаштарга «Орлята-дошколята» шимчээшкининиң тускай формазын кедиргеш, хуралдаар залды байырлыг хемчегге дүүштүр каастааш, чурукка тырттырар черни база дерээн.
Хемчегниң эң-не солун болуушкуну – чаштарның байырлыг даңгыраа болган. Ооң соонда чаштарга «Орлята России» шимчээшкинниң тускай значоктарын, галстуктарын болгаш кежигүн деп шынзылга бижиин тывыскан. Оон аңгыда, оларга өртектиг белектерни берген.
«Орлята-дошколята» Бүгү-российжи бичии уруглар шимчээшкини Тывага 2024–2025 чаа өөредилге чылында эгелээн. Бо хүннерге чедир 35 уруглар садының белеткел бөлүүнде уругларны кежигүнче киирген. Шимчээшкинниң Тывадан бир дугаар кежигүннери Кызылдың 17 дугаар болгаш «Хамнаарак» аграрлыг школа-интернаттың чаштары 2024 чылдың сентябрь 2-де хүлээп алган.
А. ОНДАР белеткээн..
Чуруктарны https://vk.com/club227283269 алган.
«Шын» №69 2024 чылдың сентябрь 11
