Часкы үеде кижилерге, ылаңгыя улуг назынныг улуска, С витамин-биле байлак ыт-кадының хандызындан кылган суксунну диетологтар сүмелеп турар. Ыт-кадындан кылган суксун дамырларны болгаш иммунитетти быжыглаар, хан базыышкынын чавызадыр.
Ол ышкаш часкы үеде организмге ажыктыг үстер чедишпестей бергенинден кижи сулараар, хөөнзүрээр, шагзыраар, ээдерээр, кежи кургап, дыргактары сыныычал апаар. Кижилер ол байдалды авитаминоз азы организмге витаминнер чедишпестей берген деп билип турар.
Ёзулуг ажыктыг байлак үстер авокадода, оливкиде, кокос болгаш оливки үзүнде, янзы-бүрү тооруктарда, далай балыында, ол ышкаш хаван чаанда турар (хаван чаан өйлүг чиир).
Кижиниң организминде артык үстерни чамдык продуктулар чидирип болур. Ол дээрге ногаан шай, корица, кара перец, петрушка, базилик, ары чигири база розмарин-дир.
«Шын» №28 2024 чылдың апрель 13
