Тыва Республиканың Чазааның Аппарат хуралынга хар суунуң часкы үеринден чурттакчылыг черлерни болгаш социал ужур-дузалыг объектилерни камгалаар талазы-биле баш удур чорудар хемчеглер дугайында чугаалашкан.
Амгы үеде республиканың девискээринде харның кылыны ортумаа-биле 25 – 45 сантиметр. Төп зонаның кожууннарының девискээринде болгаш найысылал Кызыл хоорайда хар оон элээн кылын. Эрткен неделяда республиканың девискээринде чамдык черлерге агаарның чылыы хүндүс 0°С чылыг болуп турган. Бо кыжын Тываның девискээринге агаар-бойдус чылыг болган чылдагаан-биле хар эрте эрип, ооң суу үерлеп болурунуң айыылы бар деп агаар-бойдус хайгааралының албан черлери дыңнадып сагындырган.
Дагларда хар эрээш, чурттакчылыг черлери хар суунга алзып болур сумуларны тодараткан. Бир эвес Кызыл хоорай болгаш ооң чоок-кавызы девискээрни алыр болза, хоорайның оң талакы микрорайонда Азас дээш өске-даа кудумчулар оларның артыы талазындан дагларда хар эрээш, ооң суунга алыскан таварылгалар болган.
Кызыл кожууннуң төвү Каа-Хем суурнуң мурнуу чүгүнде дагларның хары эрээш, оларның баарында кудумчуларда бажыңнарны хар суу хөме ап тургулаан.
Республиканың девискээринде үер суундан камгалалдың 38 гидротехниктиг тудуглары бар. Оларның байдалын дарый хынаар даалганы Тываның Баштыңы Владислав Ховалыг арга-ыяш болгаш бойдус курлавырларының удуртулгазынга болгаш кожууннар чагыргазының даргаларынга берген.
Хар суунуң үеринге белеткелдиң ниити хыналдазын хамааты камгалал болгаш онза байдалдар албан черлеринге даандырган.
Ш. ЛОПСАН.
“Шын” №6 2025 чылдың февраль 20
Часкы хар үери
20 февраля 2025
7