2025 чылда часкы хову ажылдарынга белеткелче Тыва Республиканың Чазаа, Көдээ ажыл-агый яамызы болгаш кожууннарның администрацияларының көдээ ажыл-агый килдистери шыңгыы кичээнгейни салып келген деп чугаалап болур. Бо чылдың январь 31-де келир часкы хову ажылдарынга белеткел ажылдарын чорударының планының дугайында хуралды Көдээ ажыл-агый яамызы эрттирген. Көдээде чер ажыл-агыйын чорудуп турар бүдүрүлгелерге үрезинни, минералдыг чемишчидилгени баш бурунгаар курлавырлаары, машина-техниканың септелгези дээш часкы хову ажылдарынга хамаарылгалыг өске-даа айтырыгларны чугаалашкан.
2025 чылдың февраль 7-ниң хүнүнде часкы хову ажылдарынга белеткел дугайында зона хуралы Чадаана хоорайга болуп эрткен. Ол хуралга Чөөн-Хемчик, Барыын-Хемчик, Өвүр, Бай-Тайга болгаш Сүт-Хөл кожууннарның көдээ ажыл-агый адырының удуртукчулары, “Россельхозцентр” федералдыг бюджет албан чериниң Тыва Республика талазы-биле эргелелиниң ажылдакчылары киржип, эрткен 2024 чылда часкы хову ажылдары кандыг байдалдыг эрткенин келир часкы хову ажылдарынга белеткел-биле холбаштыр сайгарып чугаалажып көрген. “Россельхозцентр” федералдыг бюджет албан чериниң Тыва Республика талазы-биле эргелелиниң удуртукчузу Геля Куулар үрезин курлавырынга хамаарыштыр сан-чурагайларны зона хуралының киржикчилеринге дыңнаткан. Саранча ышкаш хоралыг курттар-биле демиселге белен болурун сагындырган.
Тыва Республиканың Чазааның Аппарадының март дөртте эрткен хуралынга база часкы хову ажылдарынга белеткелди сайгарып чугаалашкан. Бо чазын бистиң республикага агаар-бойдустуң байдалының дугайында агаар-бойдус хайгааралының албан черлериниң баш бурунгаар медээлерин болгаш часкы хову ажылдарын чорударының агро-техниктиг хуусааларын барымдаалаар болза, тараа болгаш мал чеминиң культураларының үрезинин май айның 1-ден июнь айның 10-га чедир чаштырары, а картофель үрезинин болгаш ногаа аймаан май 10-дан июнь айның 20-ге чедир олуртуру таарымчалыг.
2025 чылда хову ажылдары чорудар шөлдерниң ниити хемчээли 39 муң га, а ол дээрге эрткен чылдыынга деңнээрге, 6 хуу хөй. Ол хире хемчээлдиг шөлге хову ажылдарын чорударынга 1 муң ажыг санныг машина-техника аймаан хаара тудар.
Тараа шөлдеринге чаштырар үрезинниң болгаш минералдыг чемишчидилгениң хемчээлин чиге тодарадыры, суггарылга системаларын ажыглаары дээш мурнуку чылдарда нарын бооп турган чамдык айтырыгларже шыңгыы кичээнгейни угландырарын Тываның Баштыңы Владислав Ховалыг сагындырган.
Ш. ЛОПСАН белеткээн.
“Шын” №8 2025 чылдың март 6