Балгазынныӊ арга-эзимнеринде чамдык үнүштерниӊ бүрүлери хүн херелдеринден кадып өлүп турар дээрзин Тыва Республиканыӊ арга-арыг камгалаар төвүнүӊ ажылдакчылары илереткен.
Ине бүрүлүг үнүштерниӊ хүн херелинден өртеӊ апаары ховар эвес, а агаар-бойдустуӊ онзагайындан дорт хамааржыр таварылга-дыр. Кыш эгезинде, хар эвээш дүжерге, үнүштерниӊ адаанда хөрзүнү чыварлыг соок үеде шак доӊ апаар. Март-апрель айларда агаар-бойдус сооксумаар-даа болза, аяс хүннерде, хүн херелинден үнүштерниӊ бүрүлери өртеӊ апаар. Чүге дизе ине бүрүлүг үнүштерниӊ шыгы хүннүӊ херелинге бусталып үне бээр. А чер адаанда дазылы доӊ хевээр болгаш, чулуун дамчыдып шыдавайн баар. Ынчангаш бүрүлери кургааш, өртеӊ кызыл апаар. Ылаӊгыя аныяк үнүштерниӊ мурнуу чүкче көрүнген талазы ындыг болур.
Балгазынныӊ арга-арыг ажыл-агыйыныӊ девискээринде хөй кезиинде мээстерде өзүп үнген хадыларныӊ, пөштерниӊ бүрүлери өртеӊ, а аар ийинде тарып олуртуп каан үнүштерниӊ бүрүлери көӊгүс анаа, санитарлыг байдалы эки болган.
Сосновка участогунга 2022 чылдыӊ апрель ортузундан тура агаарныӊ температуразыныӊ чылыы +16, +30 градус чедип турган, өл-шык дүшпээн., чаъс чагбаан. Хүннүӊ херелдеринден ине бүрүлүг ыяштарныӊ өртеӊнери көвүдей берген дээрзин специалистер тодараткан.
Часкы кааӊнаашкындан арга-арыгныӊ үнүштери суларап, чамдык черлерде аныяк хадылар кадып, кургап турарын демдеглээн.
«Россияныӊ арга-арыг камгалалыныӊ» салбыры – Тываныӊ арга-арыг камгалаар төвүнүӊ специалистери өртеӊ бүрүлүг аныяк үнүштерлиг черлерни улаштыр тодарадырын планнаан.
Республиканыӊ Бойдус яамызыныӊ парлалга албаныныӊ медээзи-биле Р.Демчик белеткээн.