Тыва Республиканың Баштыңы Владислав Ховалыг Москвада ажыл-агыйжы үүле-херектерни бүдүрүп чоруп турар.
Часкы суг үеринге болгаш өрт айыылдарынга белеткел, ол үеде чурттакчы чонну озал-ондактан камгалаарынга хамааржыр айтырыгларны сайгарып чугаалашкан. Россия Федерациязының Чазааның Даргазының оралакчызы Дмитрий Патрушевтиң эрттиргени хуралга Владислав Ховалыг киришкен.
2025 чылда Тывага өрт байдалы нарын болган дугайында Тываның Баштыңы бодунуң блогунда бижээн. Эрткен чылдың март айдан октябрь айга чедир республикага 179 өрт хып үнген. Онза байдалдар яамызының камгалакчыларының, арга-арыг ажыл-агый адырының ажылдакчыларының болгаш чурттакчы чоннуң демниг чоруунуң ачызында өрт айыылын чурттакчылыг черлерден чайладып, улуг озал-ондактарны болдурбаан. Харын-даа, 2024 чылдыынга деңнээрге, 36 өрт эвээш болган. 2026 чылда бистиң мурнувуста тодаргай сорулгалар турар: чурттакчы чоннуң аразынга өрт айыылынга удур тайылбырны улам идепкейлиг чорудары, өрттер хып үнмезиниң хемчеглерин баш бурунгаар алыры, өрт хып үнген таварылгада ону баштайгы бир хонук дургузунда өжүрерин чедип алыры, арга-арыглар девискээринге өрттерниң хып үнерин эвээжедири деп ол айыткан.
Чазын эрээн хар суунга болгаш суг үеринге алзып болур девискээрлерде чурттакчылыг 40 ажыг суурлар бар. Оларны камгалаар талазы-биле хемчеглерни баш бурунгаар ап чорудар. Часкы үер байдалынга дээштиг хөделириниң аргалары камгалакчыларга болгаш өске-даа албан черлериниң ажылдакчыларынга билдингир дээрзин демдеглээн.
Келир чазын суг үеринге болгаш өрт айыылынга удур кандыг хемчеглерни баш бурунгаар ап чорударынга хамаарыштыр даалгаларны чогуур яамыларның болгаш ведомстволарның, ол ышкаш республиканың кожууннарының болгаш сумуларының удуртукчуларынга бергенин Владислав Ховалыг дыңнаткан.
Лопсан МОНГУШ.
Чуруктарны ТР-ниң Чазааның парлалга албанындан алган.
“Шын” №5 2026 чылдың февраль 12
