"Сүбедей" спорт өргээзинге март 27–30 хүннеринде 2007–2009 чылда төрүттүнген оолдар, уруглар аразынга Чазак Даргазының шаңналы дээш республика чергелиг хол бөмбүүнге маргылдаа болуп эрткен. Аңаа ниитизи-биле 400 ажыг спортчулар база 21 оолдар, 19 уруглар командалары чараш оюннарны көргүскен. Маргылдааның кол-ла сорулгазы – хол бөмбүүн школачылар аразынга сайзырадыры база шыырак ойнакчыларны, командаларны, тренерлерни, школаларны илередири.
Маргылдааны харыысалгалыг болгаш бедик деңнелге эрттиреринге ТР-ниң Спорт яамызы дараазында спорт школаларын быжыглаан: Спортчу командалар белеткээр төп, Олимпийжи курлавырлар училищези база “Сүбедей” спорт школазы. Кол шииткекчи кылдыр Спортчу командалар белеткээр төптен Салгын-оол Түлүштү томуйлаан. Маргылдааның ажыдыышкынында Дээди Хуралдың Даргазы Каң-оол Даваа база Спорт яамызының оралакчы сайыды Саян Монгуш сөс ап спортчуларга, командаларга база тренер башкыларга чүгле эки оюнну, тиилелгени күзеп, байырны чедиргеннер.
Үш хүн дургузунда үргүлчүлээн оюннарның түңнелинде оолдар аразынга “Сүбедей”, ОКУ, Каа-Хем база Улуг-Хемден командалар арткан. Уруглар аразынга Ак-Довурак, Барыын-Хемчик, Каа-Хем, Улуг-Хемниң командалары шилиттинген. Сөөлгү шаңнал дээш оюннарда команда бүрүзүнүң деткикчилери, аарыкчылары тус-тузунда олуттарда аян тудуп, шүлүктеп, ырлап эштериниң хей-аъдын өөрүшкүлүг көдүрүп турганнар. Түңнелинде, оолдар аразынга олимпийжи курлавырлар командазы 1-ги черге төлептиг болган. Ийи дугаар шаңналдыг черни “Сүбедей” спорт школазының командазы алган. Үш дугаар черге Каа-Хем кожууннуң найыралдыг командазы, 4-күзүнге Улуг-Хем кожууннуң “Ноян” командазы төлептиг болган. Уруглар аразынга эрткен чылгы тиилекчилер, Ак-Довурактың командазы база катап 1-ги черге төлептиг болган. Ийи дугаар черни Барыын-Хемчиктиң командазы алган. Үшкү черже Каа-Хемниң командазы кирген. Дөрткү черде Улуг-Хемниң командазы болган.
Шаңналдыг черлерже кирген командаларга Чазак Даргазының шаңналын спорт сайыды Субудай Монгуш тывыскан. Бир дугаар чер дээш кубок, медальдар, 50 муң акша сертификады, 2 дугаар черге кубок, медальдар, 30 муң акша сертификады, 3-кү чер дээш кубок, медальдар, 20 муң акша сертификады.
Ол ышкаш тускай шаңналдарга дараазында эр, херээжен ойнакчылар төлептиг болганнар. “Тергиин халдакчы” деп атты Сыдым Домваага (ОКУ) база Диана Ооржакка (Ак-Довурак) тывыскан. “Тергиин камгалакчы” атты Азиат Допчун-оол (Каа-Хем) база Камила Тожу (Каа-Хем) алганнар. “Тергиин көдүрүкчү” Долаан Донгак (Улуг-Хем) база Белек Тайынчы (Барыын-Хемчик) болган. Баян-Мөңге Аракчаа ("Сүбедей") биле Айлана Донгак (Улуг-Хем) “Дески ойнакчы” деп атка төлептиг болганнар.
Алексей ЧАМБАЛ-ООЛ, спорттуң хоочуну.
Чуруктарны интернеттен алган.
“Шын” №12 2025 чылдың апрель 3
