Тыва Республиканың Баштыңының бо неделяда Аппарат хуралынга республиканың девискээринде эпидемиологтуг байдал дугайында чугаалашкан. Ооң кол темазы чурттакчылыг черлерниң девискээрлерин аштап-арыглаары болган.
Санитарлыг арыглаашкын болгаш чаагайжыдылга айында кышкы үеде чыылган бокту аштап- арыглаарын кожуун чагыргаларынга дааскан.
Ол ышкаш дараазында темаларны база сайгарып чугаалашкан:
Республиканың хоорай, суурларында субботниктерниң эгелээни.
Эрге-хоойлуга удур шимчээшкиннерже кыйгырыг кылганы дээш, профилактиктиг учётче 6 элээди назылыгларны тургусканы.
Школаларда терроризмге удур профилактиктиг ажылды күштелдиргени. Россияның Онза байдалдар яамызының Тывада эргелелиниң дыңнадып турары-биле алырга, республиканың девискээринде амдыызында үерге алыскан черлер чок, ол талазы-биле байдал эки.
Тываның кожууннарында үерге удур хемчеглерни кылып чорудуп турар. Эрткен неделя дургузунда республиканың девискээринге 7 өрт болган. Когараан кижилер чок.
Республикада 2 бичии кижиде улаанут (корь) аарыы илереттинген.
Март 28-те Мугур-Аксынга саргыга ызырткан бир дугаар таварылга демдеглеттинген. Саргыга ызырткан 2-ги класстың өөреникчизи үе-шаанда тарытканы эки болган.
Шагаан-Арыг хоорайның чылыг-энергетика төвүнде котельнаяның чылыглаашкынын кылыр ажылдар чоруп турар.
Бистиң корр.
«Шын» №25 2024 чылдың апрель 3
