ТР-ниң чуртталга-коммунал ажыл-агый сайыды Мерген Дагба: “Хоорайжыткан Каа-Хем суурда “Арыг суг” деп федералдыг төлевилелдиң ачызында суг сордурар улуг станция туттунган. Ооң ачызында 6 муң ажыг кижи төпчүткен суг хандырылгалыг болур. Ниитизи-биле ында “Преображенский” деп дыка улуг микрорайонну тудуп турар. Шупту инфраструктуразы чаа болур. Коммунал ажыл-агыйынга хамаарыштыр шагдан тура ындыг улуг объектилер ажыглалче киирбээн. Оон аңгыда, Ак-Довурак болгаш Хову-Аксында база чаа суг сордурар станцияларны тудуп доозупкан. Ол чүүлдер Чазактың отчёдунче кирбейн барган. Ындыг-даа болза мен аңгы демдеглекседим.
Ол ышкаш сактыр боор силер, каш чыл бурунгаар Тываны бок хөме апкан турган. Кайнаар-даа көөрге бок. Суурларда кижилер тускай бок төгер черлер чок болгаш, сумузунуң чанынга чыып турганнар. Тываның Баштыңы Владислав Ховалыг түр үе дургузунда ук айтырыгны шиитпирлепкен. Ындыг-даа болза, аңаа хамаарыштыр ам-даа өскерилгелер болгаш чаартылгаларны киирип турар. Чижээ, 3 чылдың дургузунда 84 улуг бок сөөртүр машиналар-биле республика хандыртынар. Чайга чедир 21 техника келир. Бок аңгылаар болгаш узуткаар завод база туттунар.
Оон аңгыда, Дус-Хөл, Чагытай— ынак дыштаныр черлеривиске кандыг-даа таарымчалыг байдал турбаан. Аңаа бок төгер контейнерлерни салгаш, дыштаныр дүрүмнерни чурумчуткан. Ылаңгыя машиналарны эм-дом шынарлыг сугларывысче чоокшулатпас кылып каан. Эрттирилге пунктуларын база организастаан”.
Буян ООРЖАКТЫҢ тырттырган чуруу.
“Шын” №14 2025 чылдың апрель 17