Тус черниӊ чурттакчызы чажыт медээ билип алырынга ажыглаар тускай техниктиг херекселди хоойлуга чөрүштүр садып алганы дээш судтадыр.
Найысылалдыӊ 40 харлыг чурттакчызынга хамаарыштыр кеземче херээниӊ буруудадыр түӊнелин Кызылдыӊ прокурору бадылаан. Ол чажыт медээ билип алырынга ажыглаар тускай техниктиг херекселди хоойлуга чөрүштүр садып алганы дээш РФ-тиӊ Кеземче дүрүмүнүӊ 138.1-ги чүүлүнде кем-херекти үүлгеткенинге буруудадып турар.
Истелгениӊ тайылбыры-биле алырга, ол эр кижи 2023 чылдыӊ январьда Интернет четкизин таварыштыр портативтиг видеорегистратор садып алган. Видеорегистраторну кандыг-бир херекселдиӊ азы эдилелдиӊ иштинге чажырып салып каарга, ооӊ чоогунда турар улусту тырттырар, оларныӊ үнүн бижидер функциялыг болган. Ынчангаш ол чажыт медээни бүдүү билип алырынга ажыглаар тускай техниктиг херекселдерниӊ категориязынга хамааржып турар. Ону садып турарыныӊ дугайында чарлалын социал четкилерге бижээн.
Россияныӊ Федералдыг айыыл чок чорук албаныныӊ Тыва Республикада эргелелиниӊ ажылдакчылары ооӊ хоойлуга дүүшпес кылдыныгларын болдурбайн барган.
Кеземче херээн алыс ужуру-биле сайгарып көрзүн дээш, ону Кызылдыӊ хоорай судунче чорудупкан.
Үстүнде айыттынган кем-херекти үүлгеткени дээш ол кижи 4 чыл хире хуусаа хосталгазын казыдар ялага онаажып болур.
Республика прокурорунуӊ улуг дузалакчызы С.А.Ооржак.
Р. Демчик очулдурган.