Тываның эрге-чагыргазы «Маадыр ие» деп российжи атка төлептиг болган херээжен чонга, ол ышкаш «Эрес-дидим чорук» ордени-биле үш удаа шаңнаткан кижилерге социал деткимчениң немелде хемчеглерин доктааткан. Оларны күрүне азы муниципалдыг өнчүден халас чер участоктарын алыр эргелиг хамаатылар даңзызынче киирген.
Бо неделяда Тываның Чазаа «Чер дугайында» регионалдыг хоойлуже чогуур өскерилгелерни киирип, бадылаан. Бир эвес халас чер участогу алыр эргелиг кижи чок болган таварылгада ону ооң чоок улузу — кадайы, ажы-төлү болгаш ада-иези чер участогун ап болурун айыткан эдилгени кылган.
Эдилгелерни ажылдап кылган Тываның Күш-ажыл болгаш социал хөгжүлде яамызының дыңнатканы-биле алырга, киирттинген өскертилгелер күрүнеге болгаш ниитилелге шылгараңгай ачы-хавыяазын көргүскен чамдык хамаатыларны деткип, социал камгалалдың чогуур деңнелин хандырар ужурлуг. Ынчалдыр «Маадыр ие» деп атка хамаарыштыр юридиктиг эрге-хоойлу чөрүлдээзи шиитпирлеттинген.
«Чер дугайында» хоойлунуң эрги редакциязында Тываның Баштыңының чарлыы-биле ук атка төлептиг болган херээжен улус халас чер участогун алыр эргелиг турган. Россияның Президентизиниң 2022 чылда тургускан ол-ла аттың эдилекчилери амдыгаа чедир ол даңзыже кирбээн. Бо чүүл ам шиитпирлеттинген.
"Эрес-дидим" чорук ордени-биле үш дакпыр шаңнатканнарны ачы-дуза алыкчыларының даңзызынче киирери база чөптүг деп төлевилелдиң авторлары санап турар. Бо шаңналды, амы-тынын артынга каггаш, дайынчы маадырлыг чоруктарны кылган кижилерге тыпсырын сагындыраал. А бир эвес ол кижи маадырлыг чоруктарны кылганы дээш, орденни үш катап алган болза, чүгле күрүнениң шылгарал болгаш хүндүткел шаңналдарынга эвес, а тускай деткимчеге база төлептиг болур.
А. МОНГУШ.
Чурукту интернеттен хоолгалаан.
“Шын” №6 2026 чылдың февраль 19
