Сөөлгү үеде чүгле Тывада эвес, а кайы-даа регионнарда черлик ыттарның көвүдээнин социал четкилерде хөй бижип турар. Кызылда байдал чылдан чылче нарын болуп артпышаан. Бо айтырыгга хамаарыштыр ТР-ниң Көдээ ажыл-агый сайыды кыска тайылбырны берген.
“Айтырыг нарын болгаш маргыштыг. Тыва – дотация ап турар республика болгай бис. Апрель айда бистиң яамы черлик ыттарга хамаарыштыр кылып чорудар хемчеглерниң бүгү чарыгдалдарын санап кылгаш, бир ытка хамаарыштыр 3754 рубльди тургускан. Чоокта чаа Кызылдың хоорай чагыргазы мөөрей эрттиргеш, бир ытка 8 муң ажыг рубль чарыгдалдыг ажылды күүседир дээн хүлээникчини шилип алган болуп турар. Ооң кадында Кызылда 14 муң черлик ыттар бар деп оларның үндүрген санаашкыны шынга көңгүс дүүшпейн турар. Бистиң яамының ажылдакчыларының санап үндүргени-биле алырга, хөй дизе-ле, үш муң четсе чедер.
Дириг амытаннарга чаагай сеткилдиг болгаш хумагалыг хамаарылга дугайында федералдыг хоойлунуң күүселдезин боттандырары- биле бо чылын республика бюджединден 8 сая 170 муң рубльди аңгылаан. Ол акша-түңнү муниципалиттерге кирген билдириишкиннериниң аайы-биле үлээн. Ол алган акша-түң-биле кандыг ажыл кылдынган, чеже акша чараанының дугайында медээни хүннүң-не берип турар. Сөөлгү медээ-биле алырга, 937 ытты туткан. Хыналда чорудар органнар бо талазы-биле ажылын шыңгыы чорудуп турар”.
Бистиң корр.