Честек-каттың дүжүдүн канчаар көвүдедирил?
🍓 Честек-катты тарып каан одуругларның аразын кара пленка азы кандыг-бир материал-биле шып каар. Ол сугнуң хөй кезиин боттарынче сиңирип апаар бок үнүштерден камгалаар болгаш хөрзүннүң шыгын үр тудуп алгаш турар. Пленканы салыр мурнунда одуруглар аразында черни үлдүрертип алыр. Август айның төнчүзүнде ону ап кааптар. Бо арганы ажыглаан садчыларның дүжүдү 50-60 хуу көвүдеп кээр болган.
🍓 Каттар улуг болгаш чиңгир кызыл өңнүг болзун дээш, каттарның быжарынга чедир 7-10 хонук артканда бүрүлериниң үштүң бир кезиин, а харын-даа чартыын-даа болза кезип кааптар. Колдуунда каттың чемиштерин дуглап турар бүрүлерни кезер. Ажык хүн караанга каттар дүрген быжар болгаш барык дүдүвес.
🍓 Честек-катты бүдүн чай дургузунда суггарып кээр. Дүжүт көвүдедип алырының эң-не бөдүүн аргазы ол. Чамдык садчылар чүгле дүжүт алыр үеге чедир суггарар. Кажан каттың чемижин чыып каапкан соонда, суггарбайн баар. Ол улуг частырыг-дыр. Чүге дээрге келир чылын үнер каттың бүүрекчигештери чай ортузундан эгелеп тургустунуп эгелээр. Бир эвес эчизинге чедир суггарбас болза, кат үнер бүүрекчигештер эвээш болганындан келир чылын дүжүт эвээш болур. Ынчангаш честек-катты чалгааравайн, август төнчүзүнге чедир оода-ла 2 неделяда 1 катап суггарары чугула.
Честек-каттың дүжүдү чүгле ажаалдазындан эвес, сортундан база хамааржыр. Эң-не дүжүткүр сорттарга «Альфа», «Дивная», «Славутич» база «Русич» хамааржыр. Олар чаңгыс дөстен 50 катты бериптер. Арга-дуржулгалыг садчыларның демдеглеп турары-биле алырга, аңгы-аңгы сорттарның каттарын чанынга чергелештир тарып каарга, база каттың дүжүдү көвүдээр.
“Шын” №18 2026 чылдың май 14
"Шын" солуннуң МАХ-каналынга каттыжыңар max.ru/join/egenQ...