Чурттаар оран-сава болгаш чер айтырыы чонну дүвүредип турар эң-не чидиг айтырыгларның бирээзи. Ону шиитпирлээр дээш, ТР-ниң Баштыңы элээн хөй базымнарны боттандырып, чиигелделиг ипотека деп федералдыг программаны Тывага база ажыглаар арганы чедип алган.
Удавас ук программа Тываның девискээринге ажылдап эгелээр. 2 хуулуг чиигелделиг ипотека-биле чаа тудуп турар бажыңнардан күзээни квартираны садып ап болур апаар.
«Самолет плюс» оран-сава садып-саарарынга дузалажыр федералдыг агентилелдиң Тывада салбыры ажылдап эгелээн. «Самолет плюс» федералдыг агентилелдиң Тывада салбырының удуртукчузу Аян Серен-Доржу чоннуң сонуургаан айтырыгларынга харыыларны берген.
– Чиигелделиг ипотека программазы-биле кандыг бажың садып ап болур ирги, Аян Владимирович?
– 2 хуулуг чиигелделиг ипотека программазы-биле чүгле чаа туттунуп турар бажыңнардан квартира садып алыр. Амгы үеде «Взлетная», «Мөңгүн» микрорайоннарындан садып алыр арга бар. Удавас чиигелделиг ипотека программазы-биле «Столичный» микрорайондан база ап болур дээрзин Тываның Чазаа медеглээн.
– Чиигелде чок ипотека эрттирип алгаш, ооң соонда чиигелделиг ипотека программазынче шилчидер арга бар боор бе?
– Күрүнениң деткимчези-биле 5,7 азы өг-бүле 7,7 хууга чаа тудуглардан ипотека эрттирип алгаш, 2 хуу чиигелделиг ипотека программазынче шилчидип алыр арга бар деп, Сбербанкының менеджери тайылбырлап турар. Ону бажың садып ап турар хамааты банк ажылдакчызы-биле боду ужурашкаш, чөпшээредир. Бир болза, «Самолет плюс» агентилелинге чедип келирге, дузалажып болур бис.
– Чиигелделиг ипотека программазы-биле ажыл ам-даа эгелевээнде, садып алыксааны квартираны шилээш, демдегледип алыр арга бар бе?
– Бо хүннерде Тываның чурттакчылары 2 хуулуг ипотека программазының ажылдап эгелээрин манавайн, амгы үеде ставкалар-биле квартираларны шилип, демдегледип эгелээн. Чаа туттунуп турар бажыңнарда 6 сая рубль өртектиг бажыңнар барык артпаан, доозазы саттына берген.
– Чээли алыр төөгүзү багай улус ипотека ап болур бе?
– Банк бүрүзү садып алыкчының ооң мурнунда чээли алгаш, канчаар төлеп турганын боттарыныы-биле хынаар. Садып алыкчының чиигелделиг ипотека алыр аргазы ооң бодунуң эрткен оруундан хамааржыр. Мээң сүмелээрим болза, торгаал, үндүрүг, хуулуг чээли дээш кандыг-даа өре бар болза, ипотека эрттирер бетинде өре чок кылдыр төндүр төлеп алыры чугула. Оон башка банк ипотеканы эрттирбейн барып болур. Ынчангаш баш удур белеткенип алыр болза эки.
А. ОНДАР.
«Шын» №68 2023 чылдың сентябрь 13