Тывада “Кадыкшыл” национал төлевилел-биле кадык камгалалының бирги звенозун чаартыр программаның боттанылгазы уламчылап турар. Ук программа-биле садып алдынган эмчиниң чугула дериг-херекселдери "РуСкан 70П" ультра үн сканериниң чаңгызының өртээ 4,9 сая рубль болуп турар. Бо хүннерде республиканың дөрт кожууну – Чаа-Хөл, Бии-Хем, Өвүр, Таңдының төп кожуун эмнелгелеринге Россияга кылган УЗИ аппараттарын салган.
Өвүр кожууннуң төп эмнелгезиниң акушер-гинекологу Ульяна Куулар УЗИ талазы-биле база мергежилдиг. Чаа дериг-херекселди эмчи дораан ажыглап эгелээн. "РуСкан 70П" ультра үн сканериниң ажылдаарга эптии, бедик шынарлыы болгаш диагностика чорударынга ультра үннүң хемчээлин 3D/4D хевирге база ажыглап болур арганы берип турарын эмчи демдеглээн. Ол ышкаш немелде аккумулятор сканерге үш шак дургузунда автономнуг ажылдаар үени немеп турар.
УЗИ-сканерниң кили 6 килограмм. Чиик-даа, эптиг-даа. Чугула херек үелерде холга тудуп алгаш, дажып болур бо эмчиниң херекселин дүрген дуза чедирер автомашина иштинге-даа азы аарыг кижиниң бажыңынга-даа ажыглап болур. Ол ышкаш эмнелгениң кайы-даа салбырынга аарыг улуска шинчилелдерни чорудуп болур. Чүге дээрге чаа аппарат хөй талалыг шинчилелдерни чорударынга таарымчалыг.
Сагындырып каар чүүл, кадык камгалалының бирги звенозун чаартыр программаның боттанылгазы чонга эмчи дузазының шынарын бедидер дээш эмнелгелерниң материал-техниктиг байдалын экижидеринче угланган.
ТР-ниң Кадык камгалал яамызының медээзи
