Чоокта чаа Тываның социал четкилеринге даштыкы журналистерниң Тывада чоруп турарының дугайында медээ тарай берген. Кызыл хоорайның Төлээлекчилер хуралының депутады, билдингир спортчу, тренер башкы Чингиз Алиев аңаа хамаарыштыр бодунуң бодалын илереткен:
– Эрткен неделяда бистиң Тывада америк журналистер чедип келген дээрзин социал четкилерден билип алдым. Оларның маңаа келген сорулгазын догааштырган-даа ажыы чок боор – алды арганы, беш мегени ажыглап, канчап-чооп тургаш, улустан сөс үндүрүп алыры, а ооң соонда ону украин черде нацизмниң идеяларын өстүрүп тараан АКШ-тың чагыы ёзугаар бүгү делегейге нүгүлдеп, карартыры болур.
Чүге Тываны оларның сонуургай бергени база билдингир херек – канчаарга-даа, Россияның камгалал сайыды Сергей Күжүгетович Шойгунуң төрээн чурту-ла болгай.
Бо болуушкуннуң өске талазы база бар. Америк суртаалчыларның маңаа келгенинге республиканың бөдүүн чурттакчылары таарзынмаан сеткилин илереткен. Аалчыларга эвилең-ээлдек болгаш хүндүлээчел мээң чаңгыс чер-чурттугларым барыын чурттарның нептередип тарадып турары хоп-нүгүлүн шиитпирлии-биле үзе шаварынга, аңаа удур туржурунга беленин көргүскеннер. Берге үелерде бистиң чонувус аразында чаңгыс аай демниг, тудуш харылзаалыг дээрзиниң херечизи болдум. Хөйү – хөйлең, чону – чоорган!