Кожууннуң Көдээ культура бажыңының ажылдакчыларынга чаа чогаадыкчы сезонну ажыдары, катап база бодунуң көрүкчүлери-биле ужуражыры, оларга байырлал болган.
Тус черниң артистери уран чүүлүн чонунга бараалгадып, эрткен сезонда кылган ажылының эң дээрелерин көргүзүп, сезонун ажыткан. Эрзинниң культура адырының ажылдакчылары эрткен чылын янзы-бүрү мөөрейлер, фестивальдарга удаа-дараа шаңналдыг черлерни ап, чедиишкинниг киришкеннер. Оон аңгыда, кожуунунга хөй янзы тематиктиг кежээлерже чонун чалап, оюн-тоглааны доктаамал эрттирип турган.
Чаа чогаадыкчы сезон ажыдар мурнунда кожууннуң Көдээ культура бажыңының ажылдакчылары суурларже солун оюн-тоглаалыг концерт-биле үнүүшкүннерни кылган. Концерт болган соонда, көрүкчүлер кожуунунуң артистеринге өөрүп четтиргенин илередип, чедиишкиннерни күзээн. Уран чүүлдүң ажылдакчылары боттарының ээлчээнде шак ындыг үнүүшкүннерни доктаамал чорударын аазаан.
Чурукту интернеттен алган.
“Шын” №68 2024 чылдың сентябрь 7
