Май 23-те, Россия Федерациязының 11-ги клазының доозукчулары чогаал, химия, болгаш география эртемнерин шилээннер чаңгыс аай күрүне шылгалдаларын (ЕГЭ) дужаап эгелей берген. Ол үш эртемни Тываның 700 доозукчузу шилээн.
ТР-ниң өөредилге сайыды Елена Хардикованың медеглээни-биле алырга, 2286 доозукчунуң 1294-ү биология биле химияны шилээн, а профильдиг сан болгаш физиканы 900 оолдар, уруглар шилээн. 1093 доозукчу ниити билиг эртеминге шылгалда дужаар.
«Күстен эгелээш, бүдүн чыл дургузунда доозукчуларга консультацияларны эрттирип, чаңгыс аай күрүне шылгалдаларынга белеткээн. Оон ыңай, апрель айда аңгы-аңгы эртемнерниң башкыларының киржилгези-биле дорт дамчыдылгаларны организастаан бис. Аңаа республиканың доозукчулары, ада-иелер, класс башкылары сонуургаан айтырыгларын педагогтарга салып, дорт харылзажыр аргалыг болган.
Бүгү-российжи олимпиадаларга чедиишкинниг киришкен оолдар, уругларывыс бар. «100» баллдыг түңнелдерни олардан манап турар бис. Чаңгыс аай күрүне шылгалдаларының үезинде ажы-төлүн моральдыг талазы-биле деткимче көргүзеринче ада-иелерни кыйгырып тур бис. Чүгле силерниң сагыш човаашкыныңар болгаш оожургалыңар ажы-төлүңерге дузалаар, ада-иелер!» – деп, Елена Хардикова чугаалаан.
Дараазында орус дыл эртеминге ЕГЭ май 28-те болур.
ТМГ-ниң медээлеринден
«Шын» №38 2024 чылдың май 25
![](https://sun4-21.userapi.com/impg/LwZoNJImyVAx1w9fG2uu8P79-5EKIhEi5RrJlQ/HUn2X_gpIf8.jpg?size=807x671&quality=95&sign=6630aecf1e62f8818f7e1e945e3dfb3c&c_uniq_tag=3Myg2d6k-eFp6ITJ80zLXQ19jQarzXSq-5Ck4fR5r6w&type=album)
![](https://sun4-17.userapi.com/impg/ZGKjhrtUXk1M9rpEFd_RwBnxuIqCk-7opouw7w/lOJS1w3ufBI.jpg?size=807x671&quality=95&sign=c8bd4f2dc931326a086a021a327e667c&c_uniq_tag=QDSY7uCbpKMiHRY60cTjOeJGIqvWTsG30tOzHNprXg8&type=album)
![](https://sun4-20.userapi.com/impg/Y0WS4D3VR2g48d-wWxQRUfZmvQnvwODxrC00Kw/NQRul-Ok9Hg.jpg?size=807x521&quality=95&sign=94be3ba700b05f1e12d08ccea984158e&c_uniq_tag=RxQ7RWw_w7buNLsMXq3byvY0NfP5bEL7atcTQ3qd6iw&type=album)
![](https://sun4-19.userapi.com/impg/MTBeZAn1n7Q0GTApCJpBtlQJoFhdWd_JozHmPQ/mGm4SR9FtSo.jpg?size=807x391&quality=95&sign=1c1753803a8ec3cf6c45b5ad220bee6a&c_uniq_tag=NwdT0smllrwr0ykvv9US0BST5AG-Tn9wCEvoyYl-oiA&type=album)
![](https://sun4-20.userapi.com/impg/70uElIfBQ1oNTMRk7yI0z7LYvdo-6qSMvBTQmQ/JMjT6rPJzCc.jpg?size=807x418&quality=95&sign=a6c4b038db8160b5b5192399cba038cc&c_uniq_tag=OVCQ4V7vZopPzloOlf-58pp43fe0XDc4KJzepjicNYE&type=album)