Цирк артизи, чогаалчы Агбаан оглу Алексей ХУУРАКТЫҢ 100 харлаан байырлалынга тураскааттым.
Чажыңдан-на эртем, номга хандыкшып,
Сайзыралың хүнден хүнче частып,
Чалыы үең девии-биле бодалыңны
Саазынга шүлүк кылдыр илередип,
Уран-чечен шиилерни чогааткаш,
Улус чонга белек кылдыр арттырдың.
Оскал-оолдуң цирк бөлүүн хөгжүдүп,
Оолак шааңдан дески ойнап кириштиң.
Даштыкының улуг-биче чоннары
Талантыңны кайгап-харап магадаан.
Аныяаңда аралашкан өөрлериң
Ам-даа сактып, хөөреп чоруур — кайгамчык.
Делгем, улуг ССРЭ-ниң эң шыырак
Тергииннери – он санныг жонглёрлар
Аразынче бодуң кирип, шылгарааш,
Анаа эвес талантыңны бадыткааш,
Төрел чонуң, Тыва чуртуң чоргааралы
Төөгүге ады арткан оглу сен.
Чүлдү-чүрээң ханызындан үндүрген
Шүлүктерлиг “Ыржыгаш” деп номуңда.
Амыдырал чажыттарын ажыдып,
Аянныг чараш арга-биле чогааткан,
Аңгы-аңгы хөөннерлиг ырларыңны
Амгы салгал уярадыр ырлажып чор.
Тыва чоннуң шыдамыккай маадырлыын,
Тыва чуртуң каас-чараш делгемин,
Хөөмей, сыгыт, каргырааның үнезин,
Хөгжүп орар төрээн чериң алдарлыын,
“Чадаганның аяны” деп номуңда
Чаңгыландыр, чайынналдыр алгадың.
Цирктиң онза нарын хевири –
Чиңге демир кырынга самнаар.
Караңнады холдарыңга бөөлденир,
Кашпагайыңны, баштак чаңныг бүдүжүңнү
Арысканның арга-арыы, шөлдери
Ам-даа утпаан, сактып, манап турганзыг.
Төрээн чонуң чыглып ойнаар клувунда
Мөңгежидип, адың бижип, сиилбип каан.
Хөөнү уян ыры, шүлүк чогаалдарың –
Көдүргениң кара суунуң агымы.
Уйгузу чок Улуг-Хемниң шапкыны
Ундаравас сеткилиңниң байлаа.
Арысканның чечен-мерген чонундан
Ам-даа улам салгалдарың көвүдээр.
Аныяаңдан "аъдың бажы" хойза-даа,
Алдар-адың дириг хевээр артып каар.
Чырык хүннүң черже чашкан херели
Чылдар-биле үргүлчүлээр, үзүлбес.
Чымыштыг иш хайнып турар делегей
Кезээ шагда силер-биле холбашкан
Хей-аъдывыс бедик ужуп, киискиди.
Владислав САРЖАТ-ООЛ.
"Шын" №4 2024 чылдың январь 20