📢 Республиканыӊ чону сеткилин үлежип, Чазак Даргазы В. Ховалыг-биле ажыт-чажыт чок чугаалажырынга чаӊчыга берген. Чүге дизе бюрократчы ёзу барымдаалап, ол-бо албан черлеринге барып чедип турда, айлар, чылдар шуужуп эрте бээр. Ынчангаш ниити чоннуӊ, келир салгалдарныӊ, бир организацияныӊ азы өг-бүлениӊ-даа ажыл-херээнге хамаарыштыр чамдык айтырыгларны ылап-ла Чазак Даргазы-биле дорт чугаалажыры кедилиг болгаш түӊнелдиг.
Апрель 7-де Тываныӊ Баштыӊыныӊ хууда хүлээп алыышкыны болган. Ооӊ дугайында Владислав Ховалыг социал четкиде арнынга бижээн: «Баштыӊыныӊ албан-хүлээлгелиг ажыл-херээн күүседип эгелээнимден бээр бир чыл болдум. Анаа ажылчын хүн болду. Федералдыг органнарныӊ удуртукчулары-биле ажыл-ишчи айтырыгларны сайгарып чугаалаштым. Ооӊ соонда хамаатыларга хууда хүлээп алыышкын болду.
Геше Лобсанг Тхүптен башкыныӊ субурган тудар үнелиг күзелиниӊ дугайында Валентина Владимировна Оскал-оол илеретти. Хүндүлүг башкыныӊ чагыын боттандырарын хүлээнип алган улустуӊ бирээзи ол. Субурган тудар чер дугайында бергедээшкиннер тыпты берген. Чер болгаш өнчү-хөреӊги хамаарылгаларыныӊ яамызынга бо байдалды сайгарып көргеш, дузалажыр деп даалга бердим.
Эрткен чылын төрүттүнген үш ийистиӊ авазы Чейнеш Илмурадова-биле харылзажып чугаалажып турар мен. Кижи деп адынга төлептиг болуп чурттаарынга элээн чүүлдер херек. Чурттаар бажыӊ чок деп айтырыгныӊ кайы хире нарынын кончуг эки билир мен. Оларныӊ өг-бүлезинге Туран хоорайга бажыӊны халас берген. Чейнеш Тандар-ооловна-биле сүмележип чугаалаштым. Бодумнуӊ болгаш өг-бүлемниӊ өмүнээзинден белек кылдыр хеп чуур машинаны бээр бис. Хөй уруг-дарыглыг өг-бүлеге ол чугула херек эдилел-дир.
Тывага мини-футболду сорук кирип сайзырадып чоруур Аян Соян-биле сентябрь айда кожа регионнардан командаларны чалап алгаш, улуг улус аразынга турнир эрттирер деп дугуруштувус. А ол ышкаш маргылдааны ноябрь-декабрь айда уругларга эрттирер. Аянныӊ бичии болгаш элээди, чалыы оолдарны амыдыралчы чаӊчылдарга, чижээ, кадаг кадап, сандай кылып билиринге, херек кырында өөредир, сайзырадыр төп ажыдар деп идеязын сонуургадым. Ону чүгле деткиир мен. Компьютер биле IT-технологиялар база херек. Ынчалза-даа боттуг амыдыралга бөдүүн чүүлдерни холу-биле кылып билир херек. Ниитизи-биле эки хүн болду. Ындыг чүүлдер хөй болур болза эки. Кижилер-даа, хүннер-даа»
Чазак Даргазыныӊ хууда хүлээп алыышкынын улус сураглап айтырып турары Владислав Ховалыгныӊ ажыл-ижиниӊ үре-түӊнелин чедип алыр быжыг туруштуун илередип турар.
Р.ДЕМЧИК.
