Россияда чоннуӊ информация технологияларын, информация-телекоммуникация четкизин ажыглап турарыныӊ дугайында аналитиктиг шинчилелдерни доктаамал чорудуп турар.
Красноярскыныӊ статистика албаны 2022 чылда Енисей Сибириниӊ үш регионунда 15-74 хар-назылыг улустуӊ интернет ажыглап турарыныӊ дугайында медээни белеткээн. Ону федералдыг статистиканыӊ шилилгелиг хайгааралыныӊ түӊнелдери- биле кылган.
2022 чылда Тываныӊ чурттакчы чонунуӊ 93,9 хуузу интернетти ажыглап турган. Интернет четкизинче хүннүӊ-не кирип, идепкейлиг ажыглап турар улустуӊ үлүү 85 хуу болган.
Бо сөөлгү үш айда улустуӊ 98,5 хуузу бажыӊындан үнмейн, интернет ажыглап турар болган. 51,3 хуузу ажылынга, 45,3 хуузу – таныыр билир эш-өөрүнүӊ чанынга, 41,9 хуузу орукка хөй-ниити транспорту-биле аргыжып чораан үезинде интернеттеп турар.
Чоннуӊ 68,9 хуузу мобильдиг телефоннарында, смартфоннарында соталыг харылзааныӊ интернедин, а 16 хуузу интернет көөрде, Wi-Fi болгаш харылзааныӊ өске аргаларын ажыглап турар.
Чоннуӊ 37,9 хуузу барааннар садып алырда, янзы-бүрү хандырылгалар хереглээр дээнде, интернет таварыштыр чагыдып ап турар.
Чоннуӊ 95,8 хуузу күрүнениӊ болгаш муниципалитеттиӊ ачы-дуза хандырылгаларын алыр сорулга-биле интернет ажыглап турар.
Делегей четкизи чеже-даа нептереӊгей апарган болза, ону шуут ажыглавайн турар болгаш, бир чыл ажыг интернет кирбээн кижилер база бар болган. Оларныӊ 70,6 хуузу интернет хереглевейн турарын, а 30,8 хуузу интернет-биле ажылдап билбес болгаш, ону херекке албайн турарын айыткан.
Интернет четкизинге коштурарыныӊ чарыгдалы аар дээрзин улустуӊ 11,3 хуузу, 1,4 хуузу айыыл чок болуру-биле ону коштурбайн турарын чугаалаан.
Р. ДЕМЧИК белеткээн.
«Шын» №74 2023 чылдың сентябрь 30
Чоннуӊ 85 хуузу – интернетте
30 сентября 2023
19