Тыварның ыдыктыг Дөгээ даанда бараадаар шөлдүң ажыдыышкыны июль 24-те болуп эрткен. Будда Шакьямуни бурганның тураскаалын долгандыр чаагайжыдылга ажылдарын «Таарымчалыг хоорай хүрээлелин хевирлээри» федералдыг төлевилелдиң акша-хөреңгилери болгаш Кызыл хоорайның чурттакчыларының бадылаашкынының түңнелдери-биле чоруткан.
Иркутская кудумчузунда Эмчилер сесерлииниң тудуу адакталган. Ооң төлевилелин Тываның Медицина палатазы кылган. Бо хүннерде шөлчүгеште бордюрларны салган, чечектер тарыыр хөрзүннү белеткээн, тротуарлар чадыын болгаш сценаның шалазының шывыын чадып дооскан. Сесерликтиң тудуун Тываның кадык камгалалының баштайгыларынга, “кызыл зонаның” маадырлыг эмчилеринге тураскааткан. Ооң авторларының бодалы-биле аңаа чылыг үелерде профессионалдыг эмчи ниитилежилгези ажыл-хемчеглерни эрттирер, ук девискээр хоорайжыларның дыштаныр, селгүүстээр чери апаар.
Оон аңгыда, найысылалче Абакан хоорайның талазындан кирер черде болгаш “Чөөн” сесерлиинде чаагайжыдылга ажылдары чоруттунуп турар. Бирги объектиниң белени 47 хуу, ийигизинде ажылдар барык доозулган.
Тываның чуртттакчыларының эрткен чылгы шилилгезиниң түңнелдери-биле бо чылын 19 муниципалитеттиң девискээринде 27 хөй-ниити черин чаагайжыдар.
А. ХЕРТРЕК белеткээн.