Март 26-да Кремльге РФ-тиң Президентизи Владимир Путин культура болгаш уран чүүлдүң аныяк ажылдакчыларынга шаңналдарны тывыскан.
Россияның Президентизиниң шаңналын алыр төлептиглер аразынче Коңгар-оол Ондар аттыг Тыва үндезин культура төвүнүң директорунуң оралакчызы, филология эртемнериниң кандидады, аныяк эртемден Меңги Ондарның киргени Тываның бүгү чонунуң чоргааралын оттурган.
Бир дугаарында ТР-ниң Чазак Даргазы Владислав Ховалыг: "Бүгү-россия чергелиг улуг шаңналга төлептиг болганыңар дээш байыр чедирип тур мен, Меңги Васильевна! Чоргаарланып тур бис! Россияның күжү ооң культура, ёзу-чаңчылдарының хөй хевирлиинде дээрзин Президентивис чугаалаан болгай. Президентиниң шаңналы моон-даа соңгаар чедиишкинниг ажылдаарынга улуг идиг болур дээрзинге бүзүрээр мен” – деп байыр чедирген.
Ол ышкаш аныяк эртемден коллегазының чедиишкининге чоргаарланып турарының дугайында Тыва үндезин культура төвүнүң социал четкиде арнынга мынчаар бижээн:
"Россия Федерациязының Баштыңы улуг чуртувустуң девискээринде үе-дүптен бээр демнежип чоруур чоннарның бурун шагда тургустунуп келген чаагай чаңчылдарын шинчилээр, кадагалаар база нептередир ажылды деткип, улуг кичээнгейни ынаар угландырып чорууру – күрүневистиң сайзыралынга эргежок чугула деп үнелеп билип турарының демдээ деп кѳѳр бис.
Тыва үндезин культура тѳвү үндезилеттинип тургустунганындан эгелээш, бо хүнге чедир тыва чоннуң сагыш-сеткил ѳнчүзүн нептередир сорулга-биле ус-шеверлерни, тоолчуларны, чеченнерни, хѳѳмейжилерни, адыгжыларны, эртем ажылдакчыларын база мерген угаанныг ѳгбелерни, эртем база ѳѳредилге адырының хоочуннарын, улустуң аас чогаалының кадагалакчыларын хаара тудуп, чымыштыг ишче демнештирип келген. Чылдар дургузунда бурун ѳгбелеривис баскан изи-биле чорбушаан, оларның амгы салгалдарга арттырып берген эгээртинмес сагыш-сеткил байлаан хумагалыг шыгжап, чонувуска янзы-бүрү тѳлевилелдер дузазы-биле чедирип келгенивис түңнелдиг болганынга чоргаарланып, ѳѳрүшкүвүс-биле үлежип тур бис.
Бистиң кады ажылдап чоруур эживис Меңги Ондар эртем делегейинде ады билдингир, тыва улустуң аас чогаалын шинчилеп чоруур, шыңгыы болгаш бодамчалыг культура ажылдакчыларының бирээзи. Меңги Васильевна Москваның Кремлинге Россия Федерациязының Баштыңы В.В. Путинге ужуражып, тыва чоннуң сагыш-сеткил ѳнчүзүн дараазында салгалдарга кадагалап арттырар, сайзырадыр база нептередиринге киириштирип чоруур салыышкыны дээш бедик үнелелди ап, хѳрек демдээ-биле шаңнаткан. Владимир Владимировичиниң сѳстеринге катчып, күрүневис сайзырадыр дуржулгаже үлүүн түңнелдиг киириштирген эживиске изиг байырывыс чедирип, чоргаарланып тур бис”.
Аныяк эртемденниң чедиишкининге чоргаарланып, хөй-хөй кижилерниң интернет четкизинге байыр чедириишкининге Меңги Ондар харыыны берген:
"Хүндүлүг чаңгыс чер чурттугларым!
Улуг күрүневистиң Баштыңы В.В. Путинниң шаңналын алганы-биле чылыг, чаагай, чараш сɵстериңерге улуу-биле ɵɵрүп четтирдим!
Ук шаңналдың артында Тыва үндезин культура тɵвүнүң ажылдакчыларының мөөңнеп чоруур күжү, түңнелдиг чымыштыг ажыл-ижи турар. Ажылда салып алган кыйгырыывыс: «Ада-чурт дээш! Ава Тыва дээш! Арат-чон дээш!». Кижи бүрүзүнүң чоруткан байыр чедириишкиннерин номчуп, кɵрүп тур мен. Силерниң чылыг сɵстериңер мени чүглендирип, хей-аът киирип, ам-даа улам тыва чаңчылчаан культураны сайзырадырынга янзы-бүрү тɵлевилелдерни кылып чорударынга аажок улуг идигни берди.
Чаңгыс чер чурттугларым-биле бир деңге тɵрел аймак болгаш ɵске-даа биче буурай чоннар база байыр чедириишкиннерин чорудуп турлар. Олар бисти деткип, тыва чонга чоргаарланып турарын база бистиң төрээн чуртувустуң медээлерин номчуп турарын барымдаалап, орус дыл кырынга база четтиргеним илередир-дир мен”.
Бистиң корр.
Чурукту интернеттен алган.
“Шын” №24 2024 чылдың март 30