Чаа-Хөл кожууннуң чурттакчы чонунуң аразындан тускай шериг операциязында киржип турар, дайынчы хөделиишкиннерге амы-тынындан эрес-дидими-биле чарылган, шериг хүлээлгезин күүсеткеш, төрээн чуртунче эглип келген аныяк оолдар эвээш эвес.
Тускай шериг операциязында амгы үеде киржип турар оолдары, акылары, адалары дээш чаа-хөлчүлерниң сагыш-сеткили үргүлчү дүвүреп, олар онча-менди чорзун дээш, дузалаар аргаларын бодап турарлар. Ындыг арганың бирээзи – тулчуушкун шөлүнге бистиң дайынчыларывыс дайзындан чаштынып камгаланыр четкилерни аргааш, Украинаже чорудары. Ноябрь 16-да Улуг-Хем кожууннуң волонтёрлары келгеш, Чаа-Хөлдүң волонтёрларынга дайынчылар адаанга чаштынып камгаланыр четкини канчаар аргыырын көргүзүп өөреткеннер. Бо хүннерде Чаа-Хөл кожууннуң шупту сумуларының волонтёрлары четкилерни аргып турарлар.
Чаа-Хөл суурнуң волонтёрлары четкини кожууннуң Культура төвүнде аргып турар. Адаанга чаштынып камгаланыр четкини аргыыры белен эвес херек. Четки ээлгир, хере чадарга, азы эштирге, шаарарбас, ооң адаанда дайынчылар дайзынга көзүлбес болур ужурлуг. Четкилерни чогум-на ынчаар аргыыр дээш, волонтёрлар кызып ажылдап турарлар. Оларның аразында Мария Романовна Ховалыг, Нелли Самбың-ооловна Даш дээш өске-даа улуг назы-харлыг хоочуннар база бар. Зоя Түлүшевна Өдегей, Маргарита Кыргысовна Алтай дээш элээн хөй-ниитижилер четки аргыырынга идепкейлиг киржип турар.
Камгалал четки аргыыр ажылды Алдынай Дирти удуртуп турар. Ооң өөнүң ээзи А.И. Дирти, дуңмазы Д.-Ч.Ю. Шивит-оол тускай шериг операцияның киржикчилери. Ынчангаш ТШО-же чоруткан дузаламчы бүрүзү Алдынай Юрьевнаның сеткилинге берге черде чоруур эң чоок кижилеринге дуза ышкаш болур.
Четки аргыырынга херек тускай материалдарны Чаа-Хөлдүң волонтёрлары боттарының чыгган акшазы-биле интернетте садыглар дамчыштыр садып ап турарлар.
Ш. ЛОПСАН.
Авторнуң тырттырган чуруу.
«Шын» №93 2024 чылдың декабрь 4
