Россияның Чурагайлыг сайзырал, харылзаа болгаш массалыг харылзажылга яамызы 2023 чылдың март 13-тен апрель 2-ге чедир «Чурагай кичээли» деп ниити билигниң төлевилелиниң «Смартфоннарда чүү чаштып турарыл: интернеттиң айыылы» деп темага кичээлдерни эрттирип турар.
Билиг шынарын бедидер институттуң ажылдакчылары “Чурагайлыг кичээл” болгаш “Чурагайлыг ликбез” кичээлдерин Тываның кадет корпузунга эрттирген. Ооң кол сорулгазы өөреникчилерни интернетке болгаш социал четкилерни айыыл чокка шын ажыглаарынче угланган. Интернетке сайтылар таварыштыр телефонче азы компьютерже айыыл чедирип болур вирустар болгаш киберайыылдарның хевирлерин танып билип алган.
Кичээлдиң түңнелинде өөреникчилер билип алган чүүлдери-биле үлешкен.
- Бо кичээлден хөйнү билип алдым. Билдинмес сайтылар болгаш
капсырылгаларже кирбес, янзы-бүрү вирустар болгаш интернет айыылы хораны чедирип болур. Танывазы кижилерге бодунуң дугайында информацияны чугаалавас. Телефонга оюннарны болгаш капсырылгаларны компанияның официалдыг сайтызындан киирип алыр – деп, 6-гы класстың өөреникчизи Аюш Монгуш чугаалаан.
Тывада 2019 чылдан тура, Чазак чагырганың болгаш МИЧ-тер төлээлериниң киржилгези-биле “Чурагайлыг кичээлге” 30 ажыг ажык кичээлдер болуп эрткен. Кичээлдер ам-даа уламчылаар дээрзин Билиг шынарын хынаар институттуң парлалга секретары Салбакай Тюлюш дыңнаткан.
/Бистиң корр.
