Хову-Аксы суурнуӊ Спортивный кудумчузунда хѳй аалдар чурттаар бажыӊныӊ чурттакчылары Тываныӊ Тудуг яамызынга болгаш Капиталдыг септелге фондузунга чурттап орар бажыӊыныӊ байдалыныӊ дугайында хомудал билдириишкинни киирген.
Хѳй аал чурттаар 15 биле 17 дугаарлыг бажыӊнар 1983-1984 чылдарда туттунган. Чылдар эрткен тудум, ылаӊгыя, хар-чаъстыӊ уламындан 17 дугаарлыг бажыӊ элеп баксыраан. Чылдар эртерге, ийленчек эвес чымчак дээвиириниӊ шывыыныӊ аразындан чаъс суу кирип, квартираларже дамдылап, ханазыныӊ штукатуралары хоорлуп буступ, дээвиири болгаш ханалары дүдүй берген болган.
Тус черниӊ “Плюс” башкарылга коомпаниязыныӊ директору Вероника Юшага баштаткан тѳлээлер чурттакчылар-биле хуралды эрттирген. Чурттакчыларныӊ дилээ-биле капиталдыг септелгениӊ хуусаазын бээрледирин чугаалашкан. Чүге дээрге, Спортивный кудумчузунуӊ 15 дугаарлыг бажыӊныӊ капиталдыг септелгези план ёзугаар бо чылын, берге байдалда турар 17 дугаарлыг бажыӊныӊ капиталдыг септелгези келир 2025 чылда кѳрдүнген. Квартираларныӊ ээлери 17 дугаарлыг бажыӊныӊ дээвиирин бо чылын септээрин дилээн.
Чуртталга-коммунал ажыл-агый яамызының ажылдакчылары, килдистиӊ кол специализи Салбакай Данчат, Капиталдыг септелге фондузунуӊ килдис эргелекчизи Чечена Монгуш, Капиталдыг септелге фондузунуӊ инженери Олча Настыкова олар бѳгүн чурттакчыларныӊ хуралыныӊ шиитпири болгаш билдириишкининге даянып, хыналданы чорутканнар.
Хову-Аксыныӊ Спортивный кудумчузунда турар 17 дугаарлыг бажыӊныӊ байдалы чурттакчыларныӊ билдириишкини-биле дүгжүп турарын инспекторлар тодараткан. Квартираларны хынааныныӊ түӊӊелинде, дээвиирниӊ адаанче баткан чаъс суу бажыӊнарны үреп, агаар чоруур вентиляцияның үрелгени-биле дүдүп турарын илереткен.
Тус бажыӊнарныӊ чурттакчыларыныӊ дилээ-биле Тыва Республиканыӊ Чазааныӊ Доктаалынга ѳскерилге киирер айтырыгны болгаш документилерниӊ смета тѳлевилелиниӊ эде санаашкынын чорудуп турар. Чурттакчыларныӊ дилээн хандырары-биле чылыг үе дүжүп, тудуг сезону эгелээри билек, капиталдыг септелге ажылдарын чорудуп эгелээр.
ТР-ниң Тудуг яамызының медээзинден.
