Чуртталга-коммунал ажыл-агыйга болгаш тудугга хамаарышкан айтырыглар республиканың чурттакчы бүрүзүнге хамааржыр.
ТР-ниң күрүнениң чуртталга-коммунал ажыл-агый инспекциязы 2006 чылдың декабрь 25-те тургустунган. Ынчан ук организацияга 5 кижи ажылдап турган. 2011 чылда организацияны эде адаан. Амгы үеде ук инспекцияда 14 кижи ажылда хаара туттунган.
Ук албан черинче 2024 чылдың дургузунда республиканың чурттакчыларындан 1110 дилег билдириишкин кирген. Чоннуң киирген билдириишкинин езугаар янзы-бүрү хемчеглер чоруттунган. Сагындырыглар, протоколдар бижиттинген болгаш шүүгү черинче-даа чоруткан хомудалдар бар. 41 административтиг херекти оттурган. Ниитизи-биле 2 136 500 рубль акшага торгаалды аңгы-аңгы башкарылга компанияларынга онааган.
Чуртталга-коммунал ажыл-агый хынаар органның кылган ажылының түңнелинде 2024 чылда септээр ужурлуг 288 хөй квартиралыг бажыңнарның подъездилериниң 244-ү септеттинген. 2025 чылда 44 подъездини септээри планда көрдүнген.
Баш бурунгаар тургускан график езугаар неделя санында хөй квартиралыг бажыңнарның девискээрлеринге хыналданы чорудуп, бок бар-чогун, харны аштаан-аштаваанын, бажыңнар девискээринде бок төгер контейнерлерниң богун чогуур үе-шаанда чүдүргенин дээш арыг-силигге хамааржыр ажылдарны хынап турар. Чыл дургузунда 1893 хөй квартиралыг бажыңның девискээрин хынаан, оларның 83-үнүң девискээриниң харын болгаш богун аштаваан, 46 бажыңның девискээринде контейнерлерниң богун чогуур үе-шаанда чүдүрбээн болган.
Кызыл хоорайда ниитизи-биле 29 хөй аал чурттаарбажыңда 93 лифт ажылдап турар. Оларның хөй кезиин 80-90 чылдарда-ла ажыглап эгелээн. Лифтини дүрүм езугаар 25 чыл ажыглаар ужурлуг. Ынчап кээрге, Кызылда бо хүннерде ажылдап турар лифтилерниң ажыглаар хуусаазы шагда-ла доозулган. Чуртталга-коммунал ажыл-агый инспекциязының мониторинг эрттирген түңнелинде, Кызыл хоорайның капиталдыг септелге фондузунче хөй квартиралыг 9 бажыңның 36 лифтизин солуур дугайында чагааларны чоруткан. Ук лифтилерни 2025 чылдың капиталдыг септелге планынче киирген. Ангар бульвары, Лопсанчап, Бай-Хаакская, Кочетов кудумчуларында хөй квартиралыг бажыңнарның лифтилериниң септелгези планче кирип турар.
Хоорай иштинде чамдык хөй квартиралыг бажыңнар газ-биле хандыртынган. Газ айтырыынга хамаарыштыр база чыл дургузунда чогуур хемеглерни ук организация чоруткан. Хыналданың түңнелинде Кызыл хоорайның «Газ албан чери» КХН-ни болгаш ооң мурнунда турган «Хоорай сервизи» КХН-ни хажыдыышкыннар дээш административтиг херекке онаашкан.
Башкарыкчы компанияларның хөй квартиралыг бажыңнарже чылыгны дамчыдар ажылдарны өйлеп турган үезинде изиг шугум ажыттынган турган. 5-68-01 дугаарже долгааш, квартиразы соок дээш хомудал киирген 76 хамаатының көдүрген айтырыы шиитпирлеттинген.
Башкарыкчы компаниялар чуртталга-коммунал ажыл-агый инспекциязындан ажылдаар дугайында лицензияны алыр. 2024 чылда ийи лицензия кылган. 2015 чылдан тура Тывада 67 лицензиялыг организация ажылдап турар. Бо чылын «Буура» биле Авырга» деп ийи башкарыкчы компанияның лицензиязының ажылы аңгы-аңгы чылдагааннарның уржуу-биле соксаан.
2023 чылдың октябрь 12-де ТР-ниң Чазааның Даргазының Айтыышкыны-биле «ГосуслугиДом» капсырылганы нептередир дугайында «орук картазын» бадыткаан. Чуртталга, коммунал ажыл-агый инспекциязы чогуур ажылдарны кылып чоруткан түңнелинде, 7300 хамааты ук капсырылганы идепкейлии-биле ажыглап эгелээн.
Күрүнениң тудугга хамаарыштыр хыналдазын 2024 чылда чоруткан. Республикада 93 тудуг объектизи бар, оларның 48-и хөй аал чурттаар бажыңнар, 7 – школалар, 4 – өске тудугларга хамааржыр.
Айдың ОНДАР белеткээн.
Чурукту интернет четкизинден алган.
“Шын” №99 2024 чылдың декабрь 25