Россияның Президентизи Владимир Путин «Чуртталганың инфраструктуразы» чаа национал төлевилелди саналдап үндүрген. РФ-тиң Күрүне чөвүлелиниң хуралынга төлевилелди боттандырарын чугаалажып көрген. Ол хуралга Тываның Баштыңы Владислав Ховалыг видеоконференция хевиринге киришкен.
Регионнарның хөгжүлдезинге кол ужур-дузалыг 12 федералдыг программалар чаа национал төлевилелче кирер. Олар дээрге чуртталга бажыңнарының тудуу, ипотека, чуртталга-коммунал ажыл-агыйының модернизациязы, орук четкизи, хөй-ниити транспорту дээш оон-даа өске программалар. Чаа национал төлевилелдиң 2030 чылга чедир күүсеттинер ужурлуг кол сорулгаларын Россияның Чазааның Даргазының оралакчызы Марат Хуснуллин айтып демдеглээн.
Национал төлевилелдиң кайы программаларынга Тываның киржирин республиканың яамылары федералдыг органнар-биле дугуржуп турар. Чижээлээрге, мастер-планнарны ажылдап кылыр болгаш боттандырар Россияның 200 хоорайының санынче Кызылды база киирер.
Чүгле «Хоорайның таарымчалыг хүрээлелин хевирлээри» төлевилел-биле 180 хөй-ниити девискээрлерин 2030 чылга чедир чаагайжыдар. Эң дээре төлевилелдерниң Бүгү-российжи мөөрейиниң түңнелдери-биле 2025 чылда Кызыл, Шагаан-Арыг, Туран хоорайларга 3 төлевилдерни боттандырып эгелээр. Оларны федералдыг бюджеттен 245 сая рубль-биле акшаландырар.
Бистиң корр.
“Шын” №75 2024 чылдың октябрь 2
