Тываның чурттакчылары «Чуртталгаже 10 000 базым» деп Бүгү-российжи акцияга каттышкан.
Тывага Бүгү-делегейниң чүрек хүнүнге, Кадык чүрек неделязынга болгаш Бүгү-россияның кылаш хүнүнге тураскааткан «Чуртталгаже 10 000 базым» деп акция болуп эрткен. Хемчегниң кол сорулгазы – чурттакчы чоннуң кичээнгейин бодунуң кадыкшылынче угландырары болгаш кижилерни бертик-межел байдалче болгаш ѳлүмче чыгаптар аар аарыгларны баштайгы им-демдектерден эскерип, баш удур хемчег алырынга чаңчыктырары. Ол дээрге-ле хан-дамыр, тыныш органнарының база ыжык аарыглары болур.
Ук хемчегни Республиканың медицина профилактиказы болгаш хѳй-ниитиниң кадыкшылга тѳвү организастап эрттирген. Күзелдиг киржикчилер шупту Дѳгээ дааның эдээнге чыглып алгаш, дагның шыпшык бажынга четкеш, дедир эдээнче кылаштажып, улуг орукту эрткеннер.
Бо акция Россияның, ооң иштинде Тываның булуң бүрүзүнде эртип турар. Кызылга болган акцияга 600 хире кижи киришкен. Олар дээрге ѳѳреникчилер, студентилер, янзы-бүрү адырның албан черлериниң, яамыларның ажылдакчылары болгаш эмнелге албан черлериниң кардиолог эмчилери-дир.
Бо акция 9 чыл бурунгаар бүгү-делегейниң кадык-камгалал албан чериниң мага-боттуң күш-дамыр сайзыралын эки тудары-биле бир хүнде-ле 6 муңдан 10 муң чедир кылаштаар болза эки деп сүмелээнин ёзугаар эрттирип эгелээн. БКА-ның (ВОЗ) санап турары-биле алырга, 5 муңдан эвээш кылаш «олутпай» ажылга хамааржыр.
Медээни болгаш чурукту Республиканың медицина профилактиказы болгаш хѳй-ниитиниң кадыкшылга тѳвүнден алган.
“Шын” №75 2024 чылдың октябрь 2
