Чылдың-на Чаа чылдың эң баштайгы төрүттүнген өпеязын чурттуң кайы-даа булуңунда МИЧ дораан чырыдып, демдеглээри чаңчыл болу берген.
А республиканың парлалгазында чугула черни ээлеп турар “Шын” солун шак ындыг өөрүнчүг медээлерни база чылдың-на дамчыдып турар.
Бо удаада Чаа чылда мурнай төрүттүнген чашты демдеглеп тура, эрги 2023 чылда сөөлгү төрүттүнген чашты илередири-биле “Чылдың хеймереги” деп шаңнал тыпсырын "Шын" солуннуң редакциязы дугурушкан.
''Шын'' солуннуң редакциязы “Тывамедиагрупп” ПБ-ниң удуртулгазының деткимче-дузазы-биле чаа божаан авага белектерни, 5500 рубльдиң сертификадын белеткээн.
Баш бурунгаар ол дугайында бодалды Республиканың перинаталдыг төвүнүң эмчилери-биле сүмележип, эртип турар чылдың хеймерегин илередип бээрин чугаалажып алган соонда, 2023 чылдың декабрь 31-де 22 шак 45 минута турда, 3145 килдиг, 51 сантиметр кысчыгаш Айгуль, Орлан Ламажаптарның өг-бүлезинге беш дугаар төлү болуп төрүттүнгенин эмчилер дамчыткан.
Бөгүн, январь 3-те, “Шын” солуннуң кол редактору Сайлык Монгушка баштаткан журналистер перинаталдыг төпке чедип, 2023 чылдың хеймереги болган кыстың авазы 34 харлыг, Бай-Тайганың Бай-Тал суурунуң чурттакчызы Айгуль Ивановнага байыр чедирген.
– Чогум Чаа чылдың баштайгы төлү кылдыр төрүттүнүп кээр ирги бе деп манап турувуста, кызым эртежик төрүттүнүп келген. Аңаа хомудаваан-даа мен. Кол-ла чүве – уруумнуң кадык-чаагай төрүттүнүп келгени чугула болган. Бодумнуң ук-төөгүмде өгбелерим шупту хөй ажы-төлдүг чораан. Мен бодум ада-иемниң 10 ажы-төлүнүң 9 дугаары мен. Өөм ээзи база беш кады төрээннерлиг. Ийи бодувус 4 кыс, 1 оолдуң ада-иези бис. Улуг уруувус 6 класс, ийи дугаары 5 класс, оглувус уруглар сады барып турар, ооң соонда кызывыс 1 хар ажып турар. Ам бо беш дугаар уруувусту баш бурунгаар өөм ээзи-биле дугурушканывыс ёзугаар Ай-Куш Орлановна Ламажап деп адап алдывыс. Дыка солун белек алганымга өөрүп тур мен. Ынчангаш бүгү-ле төрүттүнүп келген чаштарга болгаш оларның аваларынга чүгле быжыг кадыкшылды күзедим! – деп, манавааны онза белекке өөрүп, чаа божаан ава чугаалады.
2023 чылдың хеймерегинге удавас 100 харлаар өгбе солун “Шын” ышкаш улуг назылаарын болгаш авашкыларга быжыг кадыкшылды редакцияның ажылдакчылары күзээн.
Чылдың-на бо чаа эгелээшкинин “Шын” солун уламчылаар деп дугурушкан.
К.Монгуш
Чуруктарны Ч.Саая тырттырган.
