*Ада-чурттуң камгалалынга көргүскен массалыг маадырлыг чоруу дээш Тывада 55 дугаар мото-адыгжы (даг) бригадага “Гвардейжи” деп атты тыпсыр дугайында Чарлыкка Россияның Президентизи Владимир Путин холунуң үжүүн январь айның 3-те салган.
*2024 чылдың январь 19-та Тываның Баштыңы Владислав Ховалыг ТР-ниң Дээди Хуралынга республикада ажыл-херектерниң байдалының болгаш иштики политика дугайында Айыткалды кылган. Ол Айыткалга В. Ховалыг 2024 чылда республикага экономика, социал политика дээш өске-даа угланыышкыннарга кылып чорудар ажыл-чорудулганың уг-шиин айыткан. 2024 чылды Тывага Кадыкшылдың чылы кылдыр чарлаан.
*Россияның Президентизиниң соңгулдалары 2024 чылдың март 15–17 хүннеринде болуп эрткен. Тываның соңгуур эргелиг чурттакчыларының хөй кезии Владимир Путин дээш бадылаан.
*2024 чылдың август 8-те Кызылда Улусчу чогаадылга бажыңынга Тываның көскү күрүне болгаш хөй-ниити ажылдакчызы Г.Ч. Ширшинниң 90 харын демдеглеп эрттирген. Россия Федерациязының бедик күрүне шаңналдарының бирээзи Найырал орденни Г. Ширшинге Тываның Баштыңы Владислав Ховалыг тывыскаш, Россияның Президентизиниң өмүнээзинден байырны чедирген.
*Россияның Президентизи Владимир Путин 2024 чылдың сентябрь 2-де Тывага кээп чораан. Вавилин микрорайонда Төрээн чурттуң маадырлары аттыг школаны барып көрүп, башкылар болгаш өөреникчилер-биле ужурашкан. Президент Владимир Путин биле Владислав Ховалыг хууда ужурашкан. Республикада социал-экономиктиг байдалды сайгарып чугаалашканының түңнелинде, федералдыг органнарга дугуржуру нарын болгаш берге айтырыгларга деткимчени республиканың удуртулгазынга көргүзериниң чугулазын Президент демдеглээн.
*Тыва Республиканың Дээди Хуралының депутаттарының соңгулдалары 2024 чылдың сентябрь 8-те эрткен. Соңгукчуларның барык хөй кезииниң деткимчезин “Чаңгыс демниг Россия” политиктиг партияның мурнундан кордакчылар алган.
*Тыва Арат Республиканың ССРЭ-ге эки тура-биле каттышканының 80 чылын республикага 2024 чылда демдеглеп эрттирген. Тываның хөгжүлдезинге боттарының төлептиг үлүүн киирген хоочуннарның ачы-хавыяазын бедии-биле үнелеп, күрүне шаңналдарын хөй хоочуннарга октябрь 16-ның хүнүнде тывыскан.
*Тываның Баштыңы Владислав Ховалыг 2024 чылдың октябрь 17-де “Тува24” телеканалга республиканың чурттакчылары-биле дорт эфирни эрттирип, чонну дүвүредип турар айтырыгларга харыылаан.
*Ноябрь айда Москвага Улус ажыл-агыйының чедиишкиннериниң “Россия” делгелге-шуулганынга Тываның делгээни “Дириг ёзу-чаңчылдарның чери” деп экспозициязы российжи болгаш даштыкы чурттардан келген көрүкчүлерниң сонуургалын хаара тудуп, шуулганның эң дээре экспозицияларының санынче кирген.
*“2025 болгаш 2026–2027 чылдарда планныг үеде республика бюджединиң дугайында” хоойлу төлевилелиниң хөй-ниити чугаалажыышкыннары ноябрь 27-де эрткен. Аңаа ТР-ниң Чазааның кежигүннери, аңгы-аңгы деңнелдерниң төлээлекчи болгаш күүседикчи эрге-чагырганың удуртукчулары, хөй-ниити организацияларының төлээлери киришкен. Хөй-ниити чугаалажыышкыннар республиканың бюджедин хевирлээринге салдарлыг чугула социал-экономиктиг болгаш ниитилел-политиктиг болуушкун.
Ш. ЛОПСАН.
Чуруктарны интернет четкизинден хоолгалаан.
«Шын» №100 2024 чылдың декабрь 28
