Тываның чылыдылга-энергетика комплекизинге 1 муң ажыг специалист кадрлар херек. Республика Чазааның ээлчеглиг хуралында ол айтырыгны көдүрген. Регионнуң Одалга болгаш энергетика яамызы айтырыгның чидиин өөренип көргеш, регионалдыг ЧЭК-ти сайзырадып хөгжүдер стратегияже энергетика бүдүрүлгелеринге кадрларны белеткээрин болгаш өстүрерин көрген хемчеглерни немей киирерин саналдаан.
ТР-ниң Одалга болгаш энергетика яамызыныы-биле алырга, бо хүнде адырда 2509 кижи ажылдап турар. Эксперттерниң 10 чыл бурунгаар көрүжү-биле санаарга, ЧЭК-ке 1023 кадр херек, ооң иштинде 250 инженер, 773 ажылчын мергежилдер.
Чер адааның тывыжынга даг ажылчыннары, экскаватор, үттеп-өрүмнээр дериг-херекселдер, үндүр сөөртүр база чүдүрүп-дүжүрер машиналар машинистери, слесарьлар, проходчиктер, янзы-бүрү угланыышкыннарлыг электромонтёрлар, чылыг четкизиниң операторлары, котёлдар болгаш турбиналар машинистери, электрогазосварщиктер, чылыг четкилериниң дериг-херекселдерин септээр слесарьлар амгы үеде дыка херек.
Республиканың элээн каш техникумнарының баазазында ажылчын мергежилдер специалистерин белеткеп турар. Колдуунда-ла даг-техниктиг, политехниктиг база транспорт техникумнары чылдың-на чүс-чүс ажылчыннарны белеткеп турар. Тываның күрүне университедин «Электроэнергетика база электротехника» программалыг 20 специалист чылдың-на доозуп турар. 2024 чылда «Электро база теплотехника» угланыышкынныг 8 специалист база «Электроснабжение» программаны 11 кижи бир-ле дугаар доозуп үнген.
Регионалдыг чылыдылга-энергетика комплекизиниң кадрларының назы-хары улгадып, кадрларның чедишпес айтырыын республика бодунуң күжү-биле шиитпирлептер дээрзинге яамы бүзүрелдиг.
Аныяктарны энергетика адырынга хамаарышкан мергежилдерге өөрениринче сонуургадып, өөредилге программаларында мергежилдер болгаш билиглер даңзызын калбартып, комплекстиң бүдүрүлгелери биле профессионал өөредилге албан черлериниң аразында сырый ажылдажылганы хандырып, ол ышкаш бүдүрүлгеге чаа технологияларны идепкейлиг ажыглап, аныяктарның профессионал болгаш депшилгелиг дүрген өзүлдезинге үлүг-хууну киирери чугула.
Аналитиктерниң баш бурунгаар көрүүшкүнү-биле алырга, чылыдылга-энергетика комплекизинде инженерлер болгаш ажылчыннарның чедишпезин шинчилекчилер баш бурунгаар көрүп турар, ол дээрге чүгле Тывада эвес, а бүгү чуртта узун хуусаада боттандырар ниити угланыышкын болур. Чүгле бүдүрүлгелерниң боттарының күжү-биле ол чайлаттынмас, а күрүнениң талазындан дээштиг хемчеглер херек.
Ылаңгыя ЧЭК-тиң хереглелин өөренип көргеш, чыл санында кадрларны белеткээриниң болгаш эде өөредириниң күрүне чагыын республика деңнелинге хевирлеп тургузар.
А. МОНГУШ.
Чурукту интернет четкизинден хоолгалаан.
“Шын” №91 2024 чылдың ноябрь 27